इंदापूर | प्रतिनिधी
इंदापूर तालुक्यातील कळंब येथील विश्वासराव रणसिंग महाविद्यालयाच्या मराठी विभागाचे सहाय्यक प्राध्यापक डॉ. राजकुमार शेलार यांना युगप्रवर्तक श्री शाहू बहुउद्देशीय सेवा संस्था, महाराष्ट्र राज्य यांच्या वतीने ‘राजश्री शाहू पुरस्कार २०२६’ प्रदान करण्यात आला. लोकराजा राजश्री छत्रपती शाहू महाराज यांच्या जयंतीनिमित्त राजकारण, समाजकार्य, शिक्षण व शैक्षणिक क्षेत्रात उल्लेखनीय योगदान देणाऱ्या व्यक्तींना हा पुरस्कार दिला जातो.
डॉ. शेलार यांनी भगवान इंगळे यांच्या ‘ढोर’ या दलित आत्मकथनावर एम.फिल. पदवी प्राप्त केली असून, ‘भटक्या विमुक्त जमातींची आत्मकथने : स्वरूप आणि चिकित्सा’ या विषयावर सावित्रीबाई फुले पुणे विद्यापीठातून पीएच.डी. पदवी संपादन केली आहे.
त्यांच्या ‘दलित आत्मकथने आणि भगवान इंगळे यांचे ढोर आत्मकथन’ या ग्रंथाला ‘साहित्यरत्न लोकशाहीर अण्णाभाऊ साठे राष्ट्रीय वाङ्मय पुरस्कार’ प्राप्त झाला आहे. तसेच राष्ट्र सेवा दल आणि इंदापूर शहर नागरी संघर्ष समितीनेही त्यांच्या कार्याचा गौरव केला आहे.
ज्येष्ठ विचारवंत, इतिहास संशोधक व व्याख्याते डॉ. श्रीमंत कोकाटे यांच्या हस्ते डॉ. शेलार यांना पुरस्कार प्रदान करण्यात आला. यावेळी कैलास कदम, प्रा. कृष्णा ताटे, आजी-माजी नगरसेवक, समाजसेवक तसेच विविध क्षेत्रातील मान्यवर उपस्थित होते.
पुरस्कार स्वीकारल्यानंतर डॉ. शेलार यांनी आपल्या मनोगतात सांगितले की, राजश्री शाहू पुरस्कार हा केवळ सन्मान नसून समाजाप्रती असलेल्या जबाबदारीची जाणीव अधिक दृढ करणारा आहे. शाहू महाराजांनी दिलेल्या समता, सामाजिक न्याय आणि शिक्षणाच्या विचारांचा वारसा पुढे नेण्यासाठी शिक्षण, संशोधन, साहित्यनिर्मिती आणि समाजप्रबोधनाची कार्ये अधिक समर्पितपणे सुरू ठेवणार असल्याचे त्यांनी नमूद केले.
या यशाबद्दल इंदापूर तालुका ग्रामविकास प्रतिष्ठानच्या अध्यक्षा आनंदी रणसिंग, उपाध्यक्ष प्रकाश कदम, सचिव वीरसिंह रणसिंग, महाविद्यालयाचे प्राचार्य डॉ. अशोक काळंगे, उपप्राचार्य प्रा. ज्ञानेश्वर गुळीग, डॉ. प्रशांत शिंदे तसेच महाविद्यालयातील प्राध्यापक, विद्यार्थी आणि राजकीय, सामाजिक व शैक्षणिक क्षेत्रातील मान्यवरांनी डॉ. राजकुमार शेलार यांचे अभिनंदन केले आहे.
