इयत्ता चौथी व सातवीच्या विद्यार्थ्यांसाठी विशेष मार्गदर्शन; शिक्षकांचा शालेय वेळेव्यतिरिक्त उपक्रम
उरण | प्रतिनिधी नेहरू पोर्ट प्राथमिक व माध्यमिक विद्यालयात इयत्ता चौथी व सातवीच्या स्कॉलरशिप परीक्षेच्या विशेष अभ्यासवर्गाचा शुभारंभ मंगळवार, दि. १४ जुलै २०२६ रोजी उत्साहात झाला. स्कॉलरशिप परीक्षेतील उज्ज्वल निकालाची परंपरा कायम राखण्याच्या उद्देशाने हा उपक्रम सुरू करण्यात आला आहे.
या अभ्यासवर्गाचे उद्घाटन साई ट्रस्टचे अध्यक्ष नरसू पाटील यांच्या हस्ते झाले. यावेळी शाळेचे प्रशासकीय अधिकारी रमाकांत गावंड, मराठी माध्यमाचे मुख्याध्यापक गिरीश पाटील, इंग्रजी माध्यमाचे मुख्याध्यापक भूषण जाधव व अंकुश जोगळे, बालोद्यान विभागाच्या मुख्याध्यापिका वैशाली बोरचटे तसेच स्कॉलरशिप विषयाचे शिक्षक उपस्थित होते.
विद्यार्थ्यांच्या गुणवत्तावृद्धीसाठी हा अभ्यासवर्ग शाळेच्या नियमित वेळेपूर्वी एक तास घेण्यात येणार असून, शिक्षक स्वखुशीने अतिरिक्त वेळ देऊन विद्यार्थ्यांना मार्गदर्शन करणार आहेत. याच धर्तीवर इयत्ता दहावीच्या विद्यार्थ्यांसाठीही इंग्रजी व मराठी माध्यमात विशेष अभ्यासवर्ग सुरू असल्याने पालक व विद्यार्थ्यांमध्ये समाधानाचे वातावरण आहे.
यावेळी अध्यक्ष नरसू पाटील यांनी विद्यार्थ्यांना कठोर परिश्रमाचे महत्त्व पटवून देत, “स्कॉलरशिप मिळवण्यासाठी ध्येयवेडे व्हा. गुणवंत शिक्षकांच्या मार्गदर्शनाचा जास्तीत जास्त लाभ घ्या,” असे आवाहन केले.
प्रशासकीय अधिकारी रमाकांत गावंड यांनी विद्यार्थ्यांनी अधिक मेहनत घेऊन रायगड जिल्ह्यात सर्वाधिक स्कॉलरशिप मिळवण्याचा मान शाळेला मिळवून द्यावा, अशी अपेक्षा व्यक्त केली. तसेच या उपक्रमात योगदान देणाऱ्या सर्व शिक्षकांचे त्यांनी कौतुक केले.
मराठी माध्यमाचे मुख्याध्यापक गिरीश पाटील यांनी स्कॉलरशिप परीक्षेत सर्वाधिक गुण मिळवणाऱ्या विद्यार्थ्याला शाळेच्या झेंडावंदनाचा मान दिला जातो, ही परंपरा विद्यार्थ्यांसाठी प्रेरणादायी असल्याचे सांगितले. इंग्रजी माध्यमाचे मुख्याध्यापक अंकुश जोगळे यांनी यंदा सर्वाधिक स्कॉलरशिप मिळवून साई ट्रस्टचे नाव उंचावण्याचे आवाहन केले.
बालोद्यान विभागाच्या मुख्याध्यापिका वैशाली बोरचटे यांनी विद्यार्थ्यांनी स्कॉलरशिप मिळवून पालक व शाळेचा गौरव करावा, असे सांगितले.
कार्यक्रमाचे सूत्रसंचालन स्कॉलरशिप तज्ज्ञ मार्गदर्शिका श्रीमती योगसाधना पाटील यांनी केले. विद्यालयाच्या या उपक्रमाचे पालक व विद्यार्थ्यांकडून स्वागत होत असून, यंदाही स्कॉलरशिप परीक्षेत उल्लेखनीय यश मिळेल, असा विश्वास व्यक्त केला जात आहे.
