पुलालगतची संरक्षक भिंत कोसळल्याच्या निषेधार्थ १६ जुलै रोजी आंदोलन
नायगाव | प्रतिनिधी
राष्ट्रीय महामार्ग क्रमांक ३६१ वरील विष्णुपुरी येथे नव्याने बांधण्यात आलेल्या पुलालगतची संरक्षक भिंत कोसळल्याच्या घटनेच्या निषेधार्थ तसेच दोषींवर कठोर कारवाईच्या मागणीसाठी वंचित बहुजन युवा आघाडी, नांदेड (दक्षिण) महानगर यांच्या वतीने बुधवार, दि. १६ जुलै रोजी सकाळी ११ वाजता एस.जी.जी.एस. महाविद्यालयासमोर, विष्णुपुरी (ता. जि. नांदेड) येथे ‘काम बंद आंदोलन’ आयोजित करण्यात आले आहे.
या आंदोलनाच्या माध्यमातून संबंधित घटनेची उच्चस्तरीय व स्वतंत्र तांत्रिक चौकशी करून दोषींवर कठोर प्रशासकीय व कायदेशीर कारवाई करावी, अशी प्रमुख मागणी करण्यात येणार आहे. तसेच चौकशी पूर्ण होईपर्यंत संबंधित पुलावरील व महामार्गावरील सुरू असलेली कामे तात्काळ स्थगित करून नागरिकांच्या सुरक्षिततेची हमी द्यावी, अशीही मागणी करण्यात येणार आहे.
आंदोलनातील प्रमुख मागण्यांमध्ये विष्णुपुरी पुल दुर्घटनेची निष्पक्ष चौकशी, संबंधित कंत्राटदार कंपनी व जबाबदार अधिकाऱ्यांवर कठोर कारवाई, पुलाच्या सुरक्षिततेचा तांत्रिक अहवाल सार्वजनिक करणे तसेच भविष्यात अशा दुर्घटना टाळण्यासाठी प्रभावी उपाययोजना करणे यांचा समावेश आहे.
या आंदोलनाला वंचित बहुजन युवा आघाडीचे महाराष्ट्र प्रदेश सदस्य अक्षय (भाऊ) बनसोडे, जिल्हाध्यक्ष शंकर महाजन, युवा आघाडी जिल्हा महासचिव ॲड. वैभव लष्करे, महानगराध्यक्ष गोपालसिंह टाक, महानगर महासचिव शुद्धोधन कापसीकर यांची प्रमुख उपस्थिती लाभणार आहे.
युवक, विद्यार्थी, सामाजिक कार्यकर्ते, विविध संघटनांचे पदाधिकारी व सर्वसामान्य नागरिकांनी मोठ्या संख्येने उपस्थित राहून जनतेच्या हक्काच्या या लढ्याला बळ द्यावे, असे आवाहन वंचित बहुजन युवा आघाडी, नांदेड (दक्षिण) चे जिल्हा उपाध्यक्ष दीपक माधवराव गजभारे (घुंगराळा) यांनी केले आहे.
यावेळी दीपक गजभारे म्हणाले, “जनतेच्या जीविताच्या सुरक्षेशी तडजोड करणाऱ्यांना कोणतीही माफी नाही. सार्वजनिक कामांतील निष्काळजीपणा व निकृष्ट दर्जाच्या कामांमुळे नागरिकांचा जीव धोक्यात येत असेल, तर त्याची जबाबदारी निश्चित करून दोषींवर कठोर कारवाई झालीच पाहिजे. हा लढा कोणत्याही व्यक्तीविरोधात नसून जनतेच्या सुरक्षिततेसाठी आणि पारदर्शक प्रशासनासाठी आहे. त्यामुळे सर्व नागरिकांनी पक्षीय मतभेद बाजूला ठेवून मोठ्या संख्येने उपस्थित राहून आंदोलन यशस्वी करावे.”
