भडगाव | प्रतिनिधी
महाराष्ट्र शासनाच्या आरोग्य विभागातर्फे जुलै महिना ‘डेंग्यू प्रतिरोध महिना’ म्हणून साजरा करण्यात येत असून, त्यानिमित्त भडगाव तालुक्यातील आंचळगाव येथे डेंग्यू प्रतिबंधक जनजागृती कार्यक्रम उत्साहात पार पडला. कृष्णराव पाटील माध्यमिक विद्यालयात आयोजित या कार्यक्रमातून विद्यार्थ्यांना डेंग्यू आजाराची माहिती व प्रतिबंधात्मक उपायांविषयी मार्गदर्शन करण्यात आले.
डॉ. विवेक खतगावकर (सहाय्यक संचालक, हिवताप, नाशिक), जिल्हा आरोग्य अधिकारी डॉ. सचिन भायेकर, जिल्हा हिवताप अधिकारी डॉ. प्रमोद सोनवणे यांच्या मार्गदर्शनाखाली जिल्हाभर ही मोहीम राबविण्यात येत आहे. भडगाव तालुका आरोग्य अधिकारी डॉ. समाधान वाघ आणि पिंपरखेड प्राथमिक आरोग्य केंद्राचे वैद्यकीय अधिकारी डॉ. प्रतीक भोसले यांच्या सूचनेनुसार आरोग्य सेवक राजेंद्र पवार यांनी या कार्यक्रमाचे आयोजन केले.
यावेळी पिंपरखेड येथील आरोग्य निरीक्षक संजय सोनार (कळवाडीकर) यांनी विद्यार्थ्यांना मार्गदर्शन करताना सांगितले की, डेंग्यूवर प्रभावी नियंत्रण मिळवण्यासाठी डासांची उत्पत्ती रोखणे हा सर्वात महत्त्वाचा उपाय आहे. प्रत्येकाने आठवड्यातून एक दिवस ‘कोरडा दिवस’ पाळावा. घरातील पाण्याची सर्व भांडी रिकामी करून स्वच्छ घासून कोरडी करावीत तसेच पाण्याच्या टाक्यांवर घट्ट झाकण ठेवावे. या उपाययोजनांमुळे डासांची पैदास रोखण्यास मोठी मदत होते, असे त्यांनी सांगितले.
कार्यक्रमादरम्यान शाळेच्या वतीने आरोग्य पथकाचा सत्कार करण्यात आला.
यावेळी मुख्याध्यापक कृष्णा पाटील, ग्रामपंचायत सदस्य सुभाष जाधव, उज्ज्वल राठोड, आरोग्य सेवक राजेंद्र पवार, अभिराज चव्हाण, धनराज बोरसे, महेंद्र पाटील, पुरुषोत्तम देवरे, भगवान जायभावे, सुदर्शन पाटील यांच्यासह शिक्षकवृंद, शिक्षकेतर कर्मचारी आणि विद्यार्थी मोठ्या संख्येने उपस्थित होते.
कार्यक्रमाचे सूत्रसंचालन संजय बाविस्कर यांनी केले, तर आभार प्रदर्शन मुख्याध्यापक कृष्णा पाटील यांनी केले. कार्यक्रमाच्या यशस्वी आयोजनासाठी विद्यालयाचे शिक्षक, शिक्षिका व शिक्षकेतर कर्मचाऱ्यांनी विशेष सहकार्य केले.
