शहाद्यात राहुरी कृषी विद्यापीठ आंतरमहाविद्यालयीन बुद्धिबळ स्पर्धा संपन्न; मुलांमध्ये जैनपूर तर मुलींमध्ये कोल्हापूर कृषी महाविद्यालय विजेते.

शहादा,दि.06(प्रतिनिधी)
महात्मा फुले कृषी विद्यापीठ राहुरी अंतर्गत आयोजित आंतरमहाविद्यालयीन बुद्धिबळ (मुले-मुली) स्पर्धेत मुलांच्या गटात जैनपूर (ता. शिरोळ) कृषी महाविद्यालयाने तर मुलींच्या गटात कोल्हापूर कृषी महाविद्यालयाने बाजी मारत अजिंक्यपद पटकावले. पूज्य साने गुरुजी विद्या प्रसारक मंडळ संचलित के. व्ही. पटेल कृषी महाविद्यालय शहादा येथे या दोन दिवसीय क्रीडा महोत्सवाचे यशस्वी आयोजन करण्यात आले होते.
या स्पर्धेमध्ये राहुरी कृषी विद्यापीठांतर्गत येणाऱ्या 13 जिल्ह्यांतील विविध महाविद्यालयांचे सुमारे 200 खेळाडू, मार्गदर्शक व व्यवस्थापक सहभागी झाले होते.महाविद्यालयाच्या सभागृहात आयोजित पारितोषिक वितरण समारंभाच्या अध्यक्षस्थानी संस्थेचे उपाध्यक्ष जगदीश पाटील हे होते.

कार्यक्रमाला शहादा उपविभागाचे पोलीस अधिकारी गुलाबराव पाटील, पोलीस निरीक्षक हेमंतकुमार पाटील, विद्यापीठाचे क्रीडा अधिकारी डॉ. अभिजीत नलावडे, कोल्हापूर कृषी महाविद्यालयाचे क्रीडा अधिकारी डॉ. रामचंद्र बोरसे आणि बुद्धिबळपटू शोभराज खोंडे यांची प्रमुख उपस्थिती लाभली.उपस्थितांना मार्गदर्शन करताना उपविभागीय पोलीस अधिकारी गुलाबराव पाटील म्हणाले, “जिद्द व चिकाटीच्या जोरावर कोणत्याही स्पर्धेत यश संपादन करता येते. बुद्धिबळ या खेळात योग्य वेळी अचूक निर्णय घेणे अत्यंत महत्त्वाचे असते. मुलांमध्ये जैनपूर आणि मुलींमध्ये कोल्हापूर संघ विजेता ठरल्याने कुस्तीसोबतच कोल्हापूर आता बुद्धिबळातही आघाडीवर असल्याचे खेळाडूंनी सिद्ध केले आहे.”पोलीस निरीक्षक हेमंतकुमार पाटील यांनी आपले मनोगत व्यक्त करताना सांगितले, “आजच्या काळात क्रिकेटचा बोलबाला अधिक असताना आणि पारंपरिक खेळ मागे पडत असताना राज्यातील विविध भागांतून खेळाडू बुद्धिबळ स्पर्धेत मोठ्या संख्येने सहभागी झाले, ही कौतुकास्पद बाब आहे.” अध्यक्षीय भाषणात जगदीश पाटील यांनी विजयी खेळाडूंचे अभिनंदन करत पराभूत संघांना अधिक सराव करून आगामी स्पर्धेसाठी जोमाने तयारी करण्याचा सल्ला दिला.

स्पर्धेचा अंतिम निकाल असा:
मुलांचा गट:
प्रथम: कृषी महाविद्यालय जैनपूर (ता. शिरोळ, जि. कोल्हापूर)
द्वितीय: कृषी महाविद्यालय कोल्हापूर
तृतीय: कृषी महाविद्यालय लोणी (ता. राहता)
मुलींचा गट:
प्रथम: कृषी महाविद्यालय कोल्हापूर
द्वितीय: कृषी महाविद्यालय पुणे व कृषी महाविद्यालय रेठरे (ता. कराड, जि. सातारा)
तृतीय: कृषी महाविद्यालय धुळे
या सोहळ्याचे सूत्रसंचालन प्रा. चंद्रशेखर पाटील यांनी केले, तर उपस्थितांचे आभार प्राचार्य डॉ. प्रकाश पटेल यांनी मानले.
स्पर्धेच्या यशस्वितेसाठी संस्थेचे अध्यक्ष बापूसाहेब दीपकभाई पाटील, उपाध्यक्ष जगदीश पाटील, समन्वयक प्रा. मकरंद पाटील, संचालक मयूरभाई पाटील आणि प्राचार्य डॉ. पी. एल. पटेल यांच्या मार्गदर्शनाखाली प्रा. शोभराज खोंडे, क्रीडा संचालक प्रा. डॉ. अरविंद कांबळे, प्रा. डॉ. गोपाल गवई, प्रा. डॉ. महेश जगताप, प्रा. डॉ. आर. आर. सोनवणे, विद्यार्थी कल्याण अधिकारी प्रा. संदीप पाटील यांच्यासह सर्व प्राध्यापक, शिक्षकेतर कर्मचारी व विद्यार्थ्यांनी विशेष परिश्रम घेतले.