रस्त्याच्या दुरवस्थेमुळे नागरिक, शेतकरी व वाहनधारक त्रस्त; तातडीने दुरुस्तीची मागणी
डोंगरशेळकी परिसरातील डोंगरशेळकी–गुडसुर रस्त्याची दुरवस्था नागरिकांसाठी मोठी डोकेदुखी ठरत आहे. रस्त्यावर मोठ मोठाले खड्डे पडलेत खराब झालेला मार्ग आणि वाहतुकीच्या अडचणींमुळे वाहनधारक तसेच परिसरातील नागरिकांना मोठ्या त्रासाला सामोरे जावे लागत आहे.
या रस्त्याचा वापर विद्यार्थी, शेतकरी, कामगार आणि सर्वसामान्य नागरिक मोठ्या प्रमाणात करतात. पावसाळ्यात तर रस्त्याची परिस्थिती आणखी बिकट झाली आहे . अपघाताचा धोका वाढण्याची भीती नागरिकांनी व्यक्त केली आहे.
उदगीर मतदारसंघातील विकासकामांसाठी यापूर्वी पुढाकार घेणारे माजी मंत्री आमदार संजय बनसोडे साहेब यांनी डोंगरशेळकी–गुडसुर रस्त्याच्या प्रश्नाकडे तातडीने लक्ष द्यावे, अशी मागणी स्थानिक नागरिकांकडून होत आहे. रस्त्याची पाहणी करून संबंधित विभागाला आवश्यक सूचना देत रस्त्याच्या दुरुस्तीचे काम मार्गी लावावे, अशी अपेक्षा व्यक्त केली जात आहे.
“रस्ता हा गावाच्या विकासाची जीवनवाहिनी आहे. त्यामुळे डोंगरशेळकी–गुडसुर रस्त्याचा प्रश्न तातडीने सोडवून नागरिकांना दिलासा द्यावा,” अशी मागणी ग्रामस्थांकडून करण्यात येत आहे.
आता माजी मंत्री संजय बनसोडे साहेब या रस्त्याच्या प्रश्नाकडे किती गांभीर्याने लक्ष देतात आणि रस्त्याच्या दुरुस्तीसाठी कोणती पावले उचलतात, याकडे परिसरातील नागरिकांचे लक्ष लागले आहे.
