‘सारथी महाराष्ट्राचा’
प्रतिनिधी :
अकोला : डॉ. पंजाबराव देशमुख कृषी विद्यापीठातील सुरक्षा विभागातील स्थायी चौकीदार आर. आर. इंगळे यांनी केलेल्या तक्रारीवर विद्यापीठ प्रशासनाने चौकशी समिती गठित केली होती. या समितीचा प्राथमिक अहवाल प्रशासनास प्राप्त झाला असून, त्यानंतर संबंधित सुरक्षा पर्यवेक्षक नंदू चऱ्हाटे यांचा कार्यभार काढून श्री. काळे यांच्याकडे सोपविण्यात आला आहे.
इंगळे यांनी आपल्यावर झालेल्या कथित अन्याय, मानसिक व शारीरिक त्रास तसेच अपमानास्पद वागणुकीबाबत प्रशासनाकडे तक्रार केली होती. अपेक्षित कार्यवाही होत नसल्याने त्यांनी तीव्र भूमिका घेतली होती. मात्र, विद्यापीठ प्रशासनाने चौकशी प्रक्रिया सुरू केल्याने त्यांनी आपली तीव्र भूमिका तात्पुरती स्थगित करण्याचा निर्णय घेतला आहे.
विद्यापीठाच्या १३ ऑगस्ट २०२६ रोजीच्या पत्रानुसार, चौकशी समितीचा प्राथमिक अहवाल प्रशासनास प्राप्त झाला असून अहवालाच्या अनुषंगाने पुढील कार्यवाहीचा प्रस्ताव वरिष्ठांकडे पाठविण्यात आला आहे.
दरम्यान, सुरक्षा पर्यवेक्षक नंदू चऱ्हाटे यांचा कार्यभार बदलून श्री. काळे यांच्याकडे देण्यात आल्याने या प्रशासकीय निर्णयाला विशेष महत्त्व प्राप्त झाले आहे. मात्र, प्राथमिक अहवाल हा अंतिम निर्णय नसल्याने प्रशासनाकडून पुढे कोणती कार्यवाही केली जाते, याकडे सर्वांचे लक्ष लागले आहे.
विद्यापीठ प्रशासनाने सुरू केलेल्या चौकशी प्रक्रियेचा आदर करून इंगळे यांनी आपली तीव्र भूमिका तात्पुरती स्थगित केली असून, अंतिम, निष्पक्ष आणि समाधानकारक निर्णयासाठी कायदेशीर व लोकशाही मार्गाने पाठपुरावा सुरू ठेवणार असल्याचे त्यांनी स्पष्ट केले.
या निर्णयाची माहिती इंगळे यांनी एम.आय.डी.सी. पोलीस स्टेशन, अकोला येथील ठाणेदारांना स्वतंत्र लेखी निवेदनाद्वारे दिली आहे. कायदा व सुव्यवस्थेचा आदर करून त्यांनी आपली भूमिका स्थगित केल्याचे पोलिसांना कळविण्यात आले.
चौकशी समितीचा प्राथमिक अहवाल प्राप्त होणे आणि सुरक्षा पर्यवेक्षकाचा कार्यभार बदलणे या घडामोडींनंतर प्रकरणाने महत्त्वाचा टप्पा गाठला आहे. आता विद्यापीठ प्रशासनाने निष्पक्ष, पारदर्शक आणि वेळेत अंतिम निर्णय घेऊन संबंधितांना अधिकृत माहिती द्यावी, अशी अपेक्षा व्यक्त होत आहे.
