बांबवडे : प्रतिनिधी
कोल्हापूर जिल्ह्यातील शाहूवाडी तालुक्यातील पिशवी गावचे सुपुत्र सुभेदार मेजर उत्तम जाधव यांची भारतीय सैन्यदलात ऑनररी कॅप्टन पदावर पदोन्नती झाली आहे. त्यांच्या या उल्लेखनीय यशामुळे पिशवी गावासह संपूर्ण शाहूवाडी तालुक्यात आनंदाचे वातावरण निर्माण झाले असून त्यांच्यावर अभिनंदनाचा वर्षाव होत आहे.
प्रदीर्घ देशसेवेचा गौरव
उत्तम जाधव यांनी भारतीय लष्करात प्रदीर्घ काळ निष्ठेने, धैर्याने आणि शिस्तीने देशसेवा बजावली आहे. सुभेदार मेजर या महत्त्वाच्या पदावर कार्यरत असताना त्यांनी केलेल्या उल्लेखनीय सेवेची दखल घेत त्यांना मानाच्या ऑनररी कॅप्टन पदाने गौरविण्यात आले आहे.
या पदोन्नतीबद्दल प्रतिक्रिया व्यक्त करताना उत्तम जाधव म्हणाले, “माझ्या गावाचा आणि कोल्हापूरच्या मातीचा वारसा जपत देशसेवा करण्याची संधी मिळाली, याचा मला सार्थ अभिमान आहे.”
उत्तम जाधव यांच्या या यशामुळे पिशवी गावाच्या शिरपेचात आणखी एक मानाचा तुरा रोवला गेला आहे. त्यांच्या पदोन्नतीबद्दल लोकप्रतिनिधी, ग्रामस्थ, माजी सैनिक आणि विविध स्तरांतून त्यांचे अभिनंदन करण्यात येत असून पुढील वाटचालीस शुभेच्छा देण्यात येत आहेत.
जय हिंद! जय महाराष्ट्र! 🇮🇳
