आजरा हायस्कूलमध्ये ८०वा स्वातंत्र्यदिन उत्साहात साजरा

आजरा, दि. १५ : जनता एज्युकेशन सोसायटी, आजरा संचलित आजरा हायस्कूल, आजरा येथे भारताचा ८०वा स्वातंत्र्यदिन उत्साहपूर्ण वातावरणात साजरा करण्यात आला.
कार्यक्रमाची सुरुवात स्वागत व वंदे मातरम्‌ने झाली. यानंतर आजरा महाविद्यालयाचे NCC ऑफिसर लेफ्टनंट संजय चव्हाण यांनी NCC ऑफिसर रिपोर्टिंग केले. जनता एज्युकेशन सोसायटीचे अध्यक्ष मा. श्री. अशोकअण्णा चराटी यांच्या हस्ते ध्वजपूजन व ध्वजारोहण करण्यात आले. यावेळी संस्थेचे सर्व पदाधिकारी, सल्लागार, माजी मुख्याध्यापक, आजरा हायस्कूलचे मुख्याध्यापक शिक्षक व शिक्षकेतर कर्मचारी उपस्थित होते.
ध्वजारोहणानंतर राष्ट्रगीत व राज्यगीताचे सामूहिक गायन करण्यात आले. उपस्थितांनी नशामुक्ती प्रतिज्ञा तसेच कॉपीमुक्त प्रतिज्ञा घेतली. आजरा हायस्कूलच्या गीतमंच विभागाच्या वतीने देशभक्तिपर समूहगीत सादर करण्यात आले.

स्वातंत्र्यदिनानिमित्त शाळेतील भित्तीपत्रक लेखनानेही सर्वांचे लक्ष वेधून घेतले. कला शिक्षक श्री. युवराज शेटगे सर, श्री. तानाजी पाटील सर आणि श्री. संतोष पाटील सर यांच्या उत्कृष्ट व आकर्षक लेखनातून स्वातंत्र्यदिनाचा संदेश प्रभावीपणे मांडण्यात आला. त्यांच्या कल्पक लेखनाचे उपस्थितांनी कौतुक केले.
कार्यक्रमानिमित्त भित्तीपत्रकाचे उद्घाटन जनता एज्युकेशन सोसायटीचे उपाध्यक्ष मा. श्री. विलास नाईक यांच्या हस्ते करण्यात आले. कार्यक्रमाचे आभार श्री. एम. एस. गोरे यांनी मानले, तर सूत्रसंचालन सौ. टी. एस. पाटील यांनी केले.
या कार्यक्रमामुळे विद्यार्थ्यांमध्ये देशभक्ती, राष्ट्रीय एकात्मता आणि जबाबदार नागरिकत्वाची जाणीव अधिक दृढ झाली.