शहादा,दि.१६(प्रतिनिधी)
महाराष्ट्र राज्य मार्ग परिवहन महामंडळाकडून शहादा आगाराला उपलब्ध झालेल्या ५ अत्याधुनिक ‘जिजाऊ’ बसेसचा लोकार्पण सोहळा भारताच्या ८० व्या स्वातंत्र्यदिनाचे औचित्य साधून शहादा-तळोदा विधानसभेचे आमदार राजेश पाडवी यांच्या हस्ते उत्साहात संपन्न झाला.
या नवीन बसेसमुळे शहादा तालुक्यातील ग्रामीण भागातील प्रवासी व विद्यार्थ्यांची गेल्या अनेक महिन्यांपासून होणारी वाहतुकीची गैरसोय पूर्णपणे दूर होणार आहे.
नवीन जिजाऊ बसेसची प्रमुख वैशिष्ट्ये अशी,आधुनिक तंत्रज्ञान, बीएस सिक्स इंजिन, एअर सस्पेंशन आणि डिजिटल रूट बोर्ड.५५ आसनांची क्षमता, मोबाईल चार्जिंगसाठी पोर्ट्स.प्रवाशांच्या सुरक्षेसाठी सीसीटीव्ही कॅमेऱ्यांची यंत्रणा.
लोकार्पण सोहळा प्रसंगी बोलताना आमदार पाडवी यांनी सांगितले की, शहादा आगार हे खान्देशात सर्वाधिक उत्पन्न देणाऱ्या अग्रगण्य आगारांपैकी एक आहे. एसटी स्थानक व आगाराच्या विकासासाठी राज्य शासनाकडून सुमारे २८ कोटी रुपयांचा निधी मंजूर करण्यात आला असून, पहिल्या टप्प्यातील १४ कोटींच्या कामांना लवकरच गती मिळणार आहे. शहादा बसस्थानकाच्या नवीन ब्लू-प्रिंटला मान्यता मिळाली असून लवकरच प्रत्यक्ष कामास सुरुवात होईल.प्रवाशांची गरज ओळखून तोरणमाळ पर्यटन स्थळासाठी १० मिनी बसेस आणि १५ नवीन ‘लालपरी’ बसेसची मागणी करण्यात आली आहे.
सप्टेंबरच्या मध्यापर्यंत या बसेस उपलब्ध झाल्यानंतर दमन, नाशिक, मुंबई, बदलापूर, शेगाव यांसारख्या बंद पडलेल्या लांब पल्ल्याच्या फेऱ्या पुन्हा पूर्ववत सुरू केल्या जातील, असेही त्यांनी स्पष्ट केले.या कार्यक्रमास उपविभागीय प्रांताधिकारी दीपक गिरासे, तहसीलदार संभाजीराव पाटील, शहादा आगार प्रमुख हरीश भोई, लोकनायक जयप्रकाश नारायण सूतगिरणीचे चेअरमन दीपकभाई पाटील, उपनगराध्यक्षा माधवीताई पाटील, पोलीस निरीक्षक हेमंतकुमार पाटील, बाजार समितीचे माजी सभापती सुनील पाटील, नगरसेवक ज्ञानेश्वर चौधरी, भाजप नेत्या कल्पना पंड्या, प्रवासी संघाचे अध्यक्ष प्रा. दत्ता वाघ, प्रा. रवींद्र पंड्या, अनिल भामरे, ईश्वर पाटील, हेमराज पवार यांच्यासह कृषी उत्पन्न बाजार समितीचे संचालक मोतीलाल जैन, भाजप शहराध्यक्ष विनोद जैन, नगरसेवक राकेश पाटील आणि नागरिक मोठ्या संख्येने उपस्थित होते.
