माढेली : भारताच्या ८० व्या स्वातंत्र्यदिनानिमित्त माढेली येथे देशभक्तीचा अभिमान जागवणारी भव्य तिरंगा बाइक रॅली मोठ्या उत्साहात पार पडली. स्वातंत्र्याच्या अमृत महोत्सवानिमित्त आयोजित करण्यात आलेल्या या रॅलीचे नेतृत्व व आयोजन माजी सैनिक सचिनभाऊ धात्रक यांनी केले.
रॅलीची सुरुवात संत जगनाडे महाराज चौक येथून राष्ट्रगीत व भारत माता की जयच्या घोषणांमध्ये करण्यात आली. शेकडो दुचाकीस्वार हातात तिरंगा ध्वज घेऊन रॅलीत सहभागी झाले होते. जय हिंद, वंदे मातरम् आणि भारत माता की जयच्या घोषणांनी संपूर्ण माढेली गाव देशभक्तीच्या रंगात न्हाऊन निघाले.
रॅलीने गावातील प्रमुख मार्गांवरून मार्गक्रमण करत नागरिकांना स्वातंत्र्यसैनिकांच्या बलिदानाची आठवण करून दिली. अनेक नागरिकांनी रस्त्याच्या दुतर्फा उभे राहून रॅलीचे स्वागत केले तसेच सहभागी युवकांवर पुष्पवृष्टी करून त्यांचे उत्साहवर्धन केले.
यावेळी माजी सैनिक सचिनभाऊ धात्रक यांनी युवकांनी राष्ट्रप्रेम, सामाजिक बांधिलकी आणि राष्ट्रीय एकात्मतेची भावना जपावी, असे आवाहन केले. या उपक्रमामुळे युवकांमध्ये देशभक्तीची प्रेरणा निर्माण झाली.
भव्य तिरंगा बाइक रॅलीमुळे माढेली गावात उत्साहाचे आणि देशप्रेमाचे वातावरण निर्माण झाले. नागरिकांनी या उपक्रमाचे कौतुक करत स्वातंत्र्यदिनाचा उत्सव जल्लोषात साजरा केला.
