विभागीय प्रतिनिधी
सावदा : महाराष्ट्रात प्रतिबंधित असलेला गुटखा, विमल पानमसाला तसेच सुगंधित तंबाखूची अवैध वाहतूक करणाऱ्या टोळीवर सावदा पोलिसांनी मोठी कारवाई केली आहे. या कारवाईत मोठ्या प्रमाणात प्रतिबंधित गुटखा व तंबाखूचा साठा जप्त करण्यात आला असून, वाहतुकीसाठी वापरण्यात आलेली होंडा अमेझ कारही पोलिसांनी ताब्यात घेतली आहे.
पोलिसांना मिळालेल्या गोपनीय माहितीनुसार, प्रतिबंधित गुटख्याची मोठी खेप होंडा अमेझ कारमधून वाहून नेली जाणार होती. त्यानुसार सावदा पोलिसांनी सापळा रचून कारवाई केली. २७ ऑगस्ट २०२६ रोजी मध्यरात्री सुमारे १२.१२ वाजण्याच्या सुमारास कार थांबवून तिची तपासणी करण्यात आली.
तपासणीदरम्यान कारमध्ये प्रतिबंधित गुटखा, विमल पानमसाला, केशरयुक्त पानमसाला आणि सुगंधित तंबाखूची पाकिटे मोठ्या प्रमाणात आढळून आली. कारमध्ये उपस्थित असलेल्या चालकासह संबंधितांविरोधात कारवाई करण्यात आली असून, जप्त करण्यात आलेल्या मालाची किंमत ५ लाख २७ हजार ७०० रुपये इतकी असल्याचे सांगण्यात आले आहे.
याशिवाय, प्रतिबंधित मालाची वाहतूक करण्यासाठी वापरण्यात आलेली सुमारे ५ लाख रुपये किमतीची होंडा अमेझ कार देखील जप्त करण्यात आली. त्यामुळे या कारवाईतील एकूण मुद्देमालाची किंमत १० लाख २७ हजार ७०० रुपये इतकी असल्याची माहिती आहे.
या प्रकरणात कारचालकासह संबंधितांविरोधात गुन्हा दाखल करण्याची प्रक्रिया सुरू असून, प्राथमिक चौकशीत हा प्रतिबंधित माल मध्यप्रदेशातील बुऱ्हाणपूर येथून आणल्याचे पोलिसांच्या निदर्शनास आले आहे. हा माल भुसावळ आणि वरणगाव परिसरात किरकोळ विक्रीसाठी आणण्यात येत असल्याची माहितीही तपासात समोर आली आहे.
दरम्यान, या प्रतिबंधित मालाच्या पुरवठ्यामागे आणखी कोणाचा सहभाग आहे, तसेच माल कोणाकडून आणण्यात आला आणि कोणत्या व्यापारी किंवा व्यक्तींना त्याचे वितरण केले जाणार होते, याचा कसून तपास सावदा पोलीस करीत आहेत.
ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावित आणि वरिष्ठ पोलीस अधिकाऱ्यांच्या मार्गदर्शनाखाली करण्यात आली. कारवाईत सहाय्यक पोलीस निरीक्षक गणेश फड, पोलीस उपनिरीक्षक राहुल सानप, पोलीस हेड कॉन्स्टेबल नितेश बाविस्कर आणि पोलीस कॉन्स्टेबल संजय तडवी यांच्या पथकाने सहभाग घेतला.
या प्रकरणाचा पुढील तपास पोलीस उपनिरीक्षक राहुल सानप करीत आहेत.
