यावल, प्रतिनिधी : बिअर बारमध्ये होत असलेल्या कथित दारू विक्रीवरून झालेल्या वादाचे रूप गंभीर घटनेत झाले. तरुणांवर दहशत निर्माण करण्याच्या उद्देशाने हवेत गोळीबार केल्याच्या आरोपावरून यावल तालुक्यातील कोळन्हावी गावाचा सरपंच विकास सोलंके याला यावल पोलिसांनी अटक केली आहे. डांभुर्णी येथे गुरुवारी रात्री घडलेल्या या घटनेने ग्रामीण परिसरात मोठी खळबळ उडाली आहे.
मिळालेल्या माहितीनुसार, संशयित विकास सोलंके याचा गावाजवळ बिअर बारचा व्यवसाय आहे. गुरुवारी रात्री डांभुर्णी येथील काही तरुण या ठिकाणी गेले होते. बिअर बारमध्ये कथितपणे देशी दारूची बेकायदेशीर विक्री होत असल्याचा आरोप करत संबंधित तरुणांनी मोबाईलवर चित्रीकरण सुरू केले.
याच मुद्द्यावरून सरपंच विकास सोलंके आणि तरुणांमध्ये जोरदार वाद झाला. या वादानंतर संतप्त झालेल्या सोलंके याने संबंधित तरुणांना घाबरवण्यासाठी आणि दहशत निर्माण करण्याच्या उद्देशाने डांभुर्णी येथे जाऊन हवेत गोळीबार केल्याचा आरोप आहे.
या घटनेत सुदैवाने कोणालाही दुखापत झाली नाही. मात्र, अचानक झालेल्या गोळीबारामुळे परिसरात काही काळ भीतीचे आणि तणावाचे वातावरण निर्माण झाले.
देशी कट्टा व काडतूस जप्त
घटनेची माहिती मिळताच यावल पोलिसांनी तातडीने तपास सुरू केला. पोलिसांनी संशयिताचा शोध घेत शुक्रवारी पहाटे विकास सोलंके याला ताब्यात घेतले. त्याच्याकडून देशी बनावटीचा कट्टा, एक जिवंत काडतूस तसेच गोळीबारानंतरची एक रिकामी पुंगळी जप्त करण्यात आल्याची माहिती आहे.
घटनास्थळी मोबाईल फॉरेन्सिक व्हॅनच्या पथकानेही भेट देऊन आवश्यक पुरावे संकलित केले. प्राथमिक तपासात आरोपीने हा गावठी कट्टा सुमारे तीन महिन्यांपूर्वी एका अज्ञात व्यक्तीकडून खरेदी केल्याची माहिती समोर आली आहे.
हा अवैध कट्टा आरोपीपर्यंत नेमका कसा पोहोचला आणि या प्रकरणात इतर कोणाचा सहभाग आहे का, याचा पोलीस तपास करत आहेत. याप्रकरणी यावल पोलीस ठाण्यात गुन्हा दाखल करण्यात आला असून पुढील तपास सुरू आहे.
घटनेनंतर परिसरात शांतता व परिस्थिती नियंत्रणात असल्याची माहिती पोलिसांकडून देण्यात आली आहे.
