ढोल-ताशांचा गजर, लेझिमच्या तालावर तरुणाईचा उत्साह; तडवी समाजाच्या वतीने गणेश मंडळांचा सत्कार
मुंजलवाडी, ता. रावेर (प्रतिनिधी) : मुंजलवाडी येथे गणेश विसर्जनानिमित्त भव्य मिरवणूक उत्साहपूर्ण व भक्तिमय वातावरणात काढण्यात आली. जय बजरंग लेझिम मंडळ आणि शिव मल्हार गणेश मंडळाच्या वतीने ढोल-ताशांच्या गजरात व लेझिमच्या तालावर मिरवणुकीत उत्साहाने सहभाग नोंदविण्यात आला.
मिरवणुकीदरम्यान तरुणाईच्या उत्साहाने संपूर्ण गाव दुमदुमून गेले. पारंपरिक गणेश घोषणांनी वातावरण भक्तिमय झाले होते. गावातील प्रमुख मार्गांवरून मिरवणूक काढण्यात आली.
यावेळी तडवी समाज बांधवांच्या वतीने सर्व गणेश मंडळांच्या अध्यक्ष व उपाध्यक्षांचा नारळ व हार देऊन सत्कार करण्यात आला. या उपक्रमातून सामाजिक सलोखा आणि एकतेचा संदेश देण्यात आला.
नऊ दिवसांच्या मुक्कामानंतर लाडक्या गणरायाला निरोप देताना भाविकांमध्ये भावनिक वातावरण निर्माण झाले होते. भक्तिभावाने गणेशभक्तांनी बाप्पाला निरोप दिला.
गणेश विसर्जन मिरवणूक शांततेत आणि उत्साहात पार पडण्यासाठी पोलीस प्रशासन, मुंजलवाडीचे पोलीस पाटील तसेच ग्रामस्थांचे सहकार्य लाभले.
