६ पोलीस अधिकारी, ८५ कर्मचारी तैनात; डीजे, लेझर लाईटला निर्बंध, गुलालाची उधळण टाळण्याचे आवाहन
लोणावळा : अनंत चतुर्दशीच्या पार्श्वभूमीवर लोणावळा शहरातील गणेश विसर्जन मिरवणुकीसाठी लोणावळा शहर पोलीस प्रशासन सज्ज झाले आहे. मिरवणूक शांततेत, शिस्तीत आणि कायदा-सुव्यवस्था अबाधित ठेवत पार पडावी, यासाठी शहरात तगडा पोलीस बंदोबस्त तैनात करण्यात आला आहे.
यंदा लोणावळा शहरातील २१ गणेश मंडळे पारंपरिक पद्धतीने क्रमाने विसर्जन मिरवणुकीत सहभागी होणार आहेत. मानाच्या गणपतीसह विविध मंडळांच्या मिरवणुकीसाठी वेळेचे नियोजन करण्यात आले असून, प्रत्येक मंडळासोबत पोलीस कर्मचारी तैनात राहणार आहेत. दोन गणेश मंडळांमध्ये आवश्यक अंतर राखण्याची दक्षताही पोलिसांकडून घेतली जाणार आहे.
विसर्जन मिरवणुकीदरम्यान कोणताही अनुचित प्रकार घडू नये, यासाठी ६ पोलीस अधिकारी आणि सुमारे ८५ पोलीस कर्मचारी असा बंदोबस्त ठेवण्यात आला आहे. मिरवणुकीत डीजे, लेझर लाईट तसेच मोठ्या आवाजाच्या ध्वनिव्यवस्थेवर निर्बंध ठेवण्यात आले आहेत. गणेश मंडळांनी प्रशासनाच्या सूचनांचे पालन करून मिरवणूक शांततेत पार पाडावी, असे आवाहन पोलिसांनी केले आहे.
गुलालाची उधळण टाळण्याचे आवाहन
मोठ्या प्रमाणात गुलालाची उधळण करणाऱ्या गणेश मंडळांच्या पदाधिकाऱ्यांची पोलीस निरीक्षक सचिन पाटील यांनी बैठक घेतली. यंदा गुलालाची उधळण टाळून इतर गणेश मंडळांसमोर आदर्श निर्माण करावा, असे आवाहन त्यांनी केले.
स्वागत कमानी हटविण्याच्या सूचना
विसर्जन मिरवणुकीतील ट्रॉली व सजावटीला अडथळा निर्माण होऊ नये, यासाठी विसर्जन मार्गावरील स्वागत कमानी हटविण्याच्या सूचना गणेश मंडळांना देण्यात आल्या आहेत. तसेच राजकीय पक्षांनी स्वतंत्र स्वागत कक्ष उभारण्याऐवजी एकत्रित स्वरूपात स्वागत कक्ष उभारावा, असे आवाहन पोलिसांकडून करण्यात आले आहे.
मिरवणुकीदरम्यान विविध चौकांमध्ये स्वागत कक्ष तसेच ढोल-ताशा पथकांसाठी नियोजन करण्यात आले आहे. मंडळांनी ठरवून दिलेल्या वेळेनुसार संबंधित चौकात प्रवेश करावा, जेणेकरून संपूर्ण मिरवणूक वेळेत पूर्ण करता येईल, असे पोलिसांनी स्पष्ट केले.
लोणावळा नगरपरिषदेच्या विसर्जन घाटावर प्रकाशव्यवस्था करण्यात आली असून अतिरिक्त कर्मचारी नियुक्त करण्यात आले आहेत. विसर्जन मिरवणुकीदरम्यान नगरपरिषदेचे अधिकारी व कर्मचारीही उपस्थित राहणार आहेत.
“मिरवणुकीचा आनंद घ्या; मात्र इतरांनाही तो आनंद घेता यावा, यासाठी वेळेचे आणि प्रशासनाच्या नियमांचे भान ठेवा. गणेश मंडळांनी पोलीस प्रशासनाला सहकार्य करून शांतता व कायदा-सुव्यवस्था राखावी,” असे आवाहन लोणावळा शहर पोलिसांनी केले आहे.
