जतच्या मुख्य बाजारपेठेत मूलभूत सुविधांचा प्रश्न; नगरपरिषदेने स्वच्छतागृहाची व्यवस्था करण्याची मागणी
जत / प्रतिनिधी : जत शहरातील मुख्य बाजारपेठेत भाजी विक्री करणाऱ्या प्रत्येक विक्रेत्याकडून दररोज १० रुपये प्रमाणे कर आकारला जात असल्याचे भाजी विक्रेते व नागरिकांनी सांगितले. मात्र, बाजारपेठेत येणाऱ्या महिला विक्रेते तसेच महिला ग्राहकांसाठी स्वतंत्र, स्वच्छ व वापरण्यायोग्य स्वच्छतागृहाची पुरेशी व्यवस्था नसल्याची तक्रार करण्यात येत आहे.
जत शहरातील मुख्य बाजारपेठेत दररोज मोठ्या संख्येने नागरिक भाजीपाला खरेदीसाठी येतात. अनेक महिला विक्रेते दिवसभर बाजारात व्यवसाय करतात. त्यामुळे महिलांसाठी आवश्यक असलेल्या मूलभूत सुविधांमध्ये स्वच्छतागृहाची सुविधा महत्त्वाची ठरते. मात्र, बाजार परिसरात महिलांसाठी स्वतंत्र व स्वच्छ स्वच्छतागृह उपलब्ध नसल्याने अडचणी निर्माण होत असल्याचे नागरिक व विक्रेत्यांचे म्हणणे आहे.
भाजी विक्रेत्यांकडून नियमितपणे कर आकारला जात असेल, तर त्यातून बाजारातील स्वच्छता, पिण्याचे पाणी आणि स्वच्छतागृह यांसारख्या मूलभूत सुविधा उपलब्ध करून देण्याची अपेक्षा असल्याचे नागरिकांनी सांगितले.
“कर आकारला जातो, मग महिलांसाठी स्वच्छतागृहाची सुविधा का नाही?” असा सवाल भाजी विक्रेते व नागरिकांकडून उपस्थित करण्यात येत आहे. जत नगरपरिषदेने बाजारातील महिलांच्या सुविधांकडे गांभीर्याने लक्ष देऊन स्वतंत्र, स्वच्छ व वापरण्यायोग्य स्वच्छतागृहाची व्यवस्था करावी, अशी मागणी होत आहे.
