पावसाच्या खंडामुळे खरीप पिकांचे नुकसान; तातडीने पंचनामे, आर्थिक मदत व चारा-पाण्याची व्यवस्था करण्याची मागणी
देगलूर / प्रतिनिधी : देगलूर तालुक्यात ऑगस्ट व सप्टेंबर महिन्यात पावसाचा खंड पडल्यामुळे खरीप पिकांचे मोठ्या प्रमाणात नुकसान झाले असल्याचे सांगत तालुका कोरडा दुष्काळग्रस्त जाहीर करून शेतकरी व शेतमजुरांना तातडीने आर्थिक मदत द्यावी, अशी मागणी अखिल भारतीय छावाच्या वतीने करण्यात आली.
याबाबत अखिल भारतीय छावा संघटनेचे तालुकाध्यक्ष रमेश पाटील यांनी दि. २४ रोजी उपजिल्हाधिकारी व तहसीलदार, देगलूर यांना निवेदन दिले. नुकसानग्रस्त पिकांचे तातडीने पंचनामे करण्यासाठी प्रधानमंत्री पीकविमा यंत्रणेला सूचना द्याव्यात, तसेच पीकविम्याचा लाभ मिळण्यासाठी आवश्यक कार्यवाही जलदगतीने करावी, अशी मागणी निवेदनातून करण्यात आली.
पावसाअभावी शेतकऱ्यांसमोर निर्माण झालेली आर्थिक अडचण लक्षात घेऊन तातडीने मदत द्यावी. तसेच जनावरांसाठी चारा व पिण्याच्या पाण्याची व्यवस्था करावी, अशी मागणीही छावाच्या वतीने करण्यात आली.
यावेळी शिवराज पाटील, सोमनाथ पाटील, ज्ञानेश्वर पाटील, मंगेश इंगळे, जावेद धनंजकर, गजानन पाटील, दीपक ढगे, चंद्रकांत पाटील, ऋषिकेश पाटील, प्रसाद पाटील, नागेश पाटील, रितेश पाटील, सोमेश पाटील, राजू बोडके, रामलू सज्जन यांच्यासह छावाचे पदाधिकारी व कार्यकर्ते उपस्थित होते.
निवेदनातील मागण्यांवर तातडीने कार्यवाही न झाल्यास छावा संघटनेच्या वतीने आंदोलन छेडण्यात येईल, असा इशाराही यावेळी देण्यात आला.
