गोठणपूर परिसरातील उद्यानातील वाढलेले गवत व कचरा हटविला; नागरिकांकडून उपक्रमाचे कौतुक
प्रतिनिधी:
कुरुंदवाड : शिरोळ तालुक्यातील कुरुंदवाड शहरातील गोठणपूर परिसरातील भीमाई उद्यानाची स्वच्छता नगरसेवक बाबासाहेब ऊर्फ जय मल्लू कडाळे यांनी स्वखर्चातून करून घेतली. उद्यान परिसरात वाढलेले गवत, कचरा व अस्वच्छता दूर करून संपूर्ण परिसराची स्वच्छता करण्यात आली.
भीमाई उद्यान हे नागरिकांसाठी विरंगुळ्याचे तसेच लहान मुलांसाठी खेळण्याचे महत्त्वाचे ठिकाण आहे. मात्र, काही दिवसांपासून उद्यान परिसरात वाढलेले गवत व अस्वच्छतेमुळे नागरिकांना त्रास सहन करावा लागत होता. ही बाब लक्षात येताच नगरसेवक जय कडाळे यांनी पुढाकार घेत स्वखर्चातून उद्यानाची स्वच्छता करून घेतली.
स्वच्छतेनंतर उद्यान परिसराने पुन्हा स्वच्छ व प्रसन्न रूप धारण केले असून नागरिकांना मोठा दिलासा मिळाला आहे. सार्वजनिक ठिकाणांच्या स्वच्छतेसाठी केवळ प्रशासनावर अवलंबून न राहता सामाजिक बांधिलकीच्या भावनेतून लोकप्रतिनिधींनीही पुढाकार घेण्याची गरज या उपक्रमातून अधोरेखित झाली आहे.
नगरसेवक जय कडाळे यांच्या या उपक्रमाचे कुरुंदवाड शहर व परिसरातील नागरिकांकडून कौतुक होत आहे. ‘आधी कृती, नंतर प्रसिद्धी’ या भूमिकेतून त्यांनी केलेल्या उपक्रमामुळे सार्वजनिक स्वच्छतेबाबत सकारात्मक संदेश गेला असून, नागरिक व लोकप्रतिनिधींनी अशा उपक्रमांचे अनुकरण केल्यास शहराच्या स्वच्छतेला अधिक चालना मिळू शकते.
