ध्वनीमर्यादेचे उल्लंघन करणाऱ्या गणेश मंडळांवर पोलिसांची कारवाई; ध्वनीक्षेपक यंत्रणा व साहित्य जप्त
पुणे प्रतिनिधी:
पुणे : गणेशोत्सवाच्या सातव्या दिवसाच्या विसर्जन मिरवणुकीदरम्यान निर्धारित ध्वनीमर्यादेचे उल्लंघन करून डीजे वाजविणाऱ्या गणेश मंडळांवर पिंपरी-चिंचवड पोलिसांनी कारवाई केली. पिंपरी-चिंचवड पोलीस आयुक्तालयाच्या हद्दीतील विविध सहा पोलीस ठाण्यांमध्ये एकूण २० गुन्हे दाखल करण्यात आले आहेत. यामध्ये सांगवी पोलीस ठाण्याच्या हद्दीत सर्वाधिक नऊ प्रकरणांची नोंद झाली आहे.
गणेशोत्सवाच्या पार्श्वभूमीवर पोलिसांकडून सार्वजनिक गणेश मंडळांच्या पदाधिकाऱ्यांच्या बैठका घेण्यात आल्या होत्या. या बैठकीत ध्वनीप्रदूषणासंदर्भातील नियम, न्यायालयीन निर्देश तसेच नियमांचे उल्लंघन केल्यास होणाऱ्या कायदेशीर कारवाईबाबत माहिती देण्यात आली होती. निर्धारित ध्वनीमर्यादेचे पालन करण्याचे आवाहनही पोलिसांनी केले होते.
मात्र, सातव्या दिवसाच्या विसर्जन मिरवणुकीदरम्यान काही गणेश मंडळांकडून या सूचनांचे उल्लंघन झाल्याचे पोलिसांच्या निदर्शनास आले. त्यानंतर संबंधित मंडळे, डीजे चालक व मालकांविरुद्ध गुन्हे दाखल करण्यात आले. कारवाईदरम्यान वापरण्यात आलेली ध्वनीक्षेपक यंत्रणा व इतर साहित्य जप्त करण्यात आले.
पोलिसांच्या माहितीनुसार, सांगवी पोलीस ठाण्याच्या हद्दीत नऊ, तळेगाव दाभाडे येथे पाच, एमआयडीसी भोसरी आणि शिरगाव-परंदवडी येथे प्रत्येकी दोन, तर तळेगाव एमआयडीसी आणि बावधन येथे प्रत्येकी एका प्रकरणात कारवाई करण्यात आली.
शिरगाव-परंदवडी पोलीस ठाण्याच्या हद्दीत दोन गणेश मंडळांवर कारवाई करण्यात आली. या कारवाईत डीजे साऊंड सिस्टिम, दोन मिक्सर, दोन ॲम्प्लीफायर मशीन तसेच एक वाहन पोलिसांनी जप्त केले.
गणेश विसर्जन मिरवणुका उत्साहात पार पडत असताना सार्वजनिक उत्सवाचा उत्साह कायम ठेवून ध्वनीमर्यादा व कायदेशीर नियमांचे पालन करण्याचे आवाहन पोलिसांकडून करण्यात आले आहे.
