मुख, गर्भाशय व स्तन कर्करोगाची होणार तपासणी; नागरिकांनी मोठ्या संख्येने सहभागी होण्याचे आवाहन
लासलगाव | प्रतिनिधी
नाशिक जिल्ह्यातील लासलगाव ग्रामीण रुग्णालय येथे मंगळवार, दि. ६ ऑक्टोबर २०२६ रोजी सकाळी ९ ते दुपारी २ वाजेपर्यंत मोफत कॅन्सर तपासणी शिबिराचे आयोजन करण्यात आले आहे. जिल्हा रुग्णालय, नाशिक यांच्या पुढाकाराने हे शिबिर आयोजित करण्यात आले असून परिसरातील नागरिकांनी मोठ्या संख्येने सहभागी होऊन या आरोग्य सुविधेचा लाभ घ्यावा, असे आवाहन करण्यात आले आहे.
या शिबिरामध्ये मुख कर्करोग, गर्भाशयाचा कर्करोग तसेच स्तनाचा कर्करोग यांची मोफत तपासणी करण्यात येणार आहे. कर्करोगाचे वेळेवर निदान आणि उपचारासाठी नियमित आरोग्य तपासणी महत्त्वाची असल्याने नागरिकांनी स्वतःसह कुटुंबीयांचीही तपासणी करून घ्यावी, असे आरोग्य विभागाच्या वतीने सांगण्यात आले आहे.
जिल्हा शल्यचिकित्सक डॉ. सतीश शिंपी, निवासी वैद्यकीय अधिकारी डॉ. संदीप सूर्यवंशी, अतिरिक्त जिल्हा शल्यचिकित्सक डॉ. निलेश पाटील, ग्रामीण रुग्णालय लासलगावचे वैद्यकीय अधीक्षक डॉ. बाळकृष्ण अहिरे तसेच तालुका आरोग्य अधिकारी डॉ. कोशिरे यांच्या मार्गदर्शनाखाली हे शिबिर आयोजित करण्यात येत आहे.
दि. ६ ऑक्टोबर रोजी कॅन्सर तपासणी व्हॅन ग्रामीण रुग्णालय, लासलगाव येथे उपलब्ध राहणार आहे. त्यामुळे नागरिकांनी कोणताही संकोच न करता शिबिरात सहभागी होऊन मोफत आरोग्य तपासणी करून घ्यावी, असे आवाहन ग्रामीण रुग्णालयाच्या वतीने करण्यात आले आहे.
‘आरोग्य हीच खरी संपत्ती’ असून कर्करोगाचे लवकर निदान उपचाराच्या दृष्टीने महत्त्वाचे ठरते. त्यामुळे नागरिकांनी या शिबिराचा लाभ घ्यावा, असे आवाहन करण्यात आले आहे.
