शहादा,दि.१२(का.प्र.)
येथील पूज्य साने गुरुजी विद्या प्रसारक मंडळाच्या महाविद्यालयात नवीन मतदारांसाठी विशेष मतदान जागृती व मार्गदर्शन कार्यक्रमाचे आयोजन करण्यात आले होते.
शहादा तालुका मतदान नोंदणी अधिकारी तथा उपविभागीय अधिकारी दीपक गिरासे आणि तहसीलदार संभाजीराव पाटील यांच्या मार्गदर्शनाखाली निवडणूक नायब तहसीलदार रतनसिंग राजपूत यांनी उपस्थित महाविद्यालयीन विद्यार्थ्यांना मतदान नोंदणीचे महत्त्व पटवून दिले.यावेळी मार्गदर्शन करताना श्री. रतनसिंग राजपूत म्हणाले की, देशाच्या विकासात युवाशक्तीचा वाटा अत्यंत महत्त्वाचा आहे. भारत हा जगातील सर्वात मोठा लोकशाही प्रधान देश आहे, त्यामुळे प्रत्येक नागरिकाने आपल्या मतदानाच्या हक्काबाबत जागरूक राहून या प्रक्रियेत सक्रिय सहभाग घेतला पाहिजे.
१८ वर्षे पूर्ण झालेल्या प्रत्येक विद्यार्थ्याने आपल्या गावातील बी.एल.ओ. यांच्याशी संपर्क साधून आपले नाव मतदार यादीत त्वरित नोंदवून घ्यावे. केवळ स्वतःच नाही तर आपले मित्र, कुटुंबातील सदस्य आणि गावातील सर्व नवीन मतदारांमध्ये मतदानाविषयी जागरूकता निर्माण करण्याची जबाबदारी युवकांनी पार पाडावी, असे आवाहनही त्यांनी यावेळी केले.या कार्यक्रमासाठी पूज्य साने गुरुजी विद्या प्रसारक मंडळाचे अध्यक्ष बापूसाहेब दीपकभाई पाटील, उपाध्यक्ष जगदीशभाई पाटील, संस्थेच्या सचिव सौ. जयश्रीताई पाटील व समन्वयक प्रा. मकरंदभाई पाटील यांचे विशेष मार्गदर्शन लाभले.या प्रसंगी महाविद्यालयाचे प्राचार्य डॉ. एम. के. पटेल, कनिष्ठ महाविद्यालयाच्या उपप्राचार्या प्रा. सौ. कल्पना पटेल, पर्यवेक्षक प्रा. के. एच. नागेश, प्रा. व्ही. सी. डोळे, प्रा. ए. पी. पाटील यांच्यासह सर्व प्राध्यापक बंधू-भगिनी उपस्थित होते.यावेळी निवडणूक विभागाचे संगणक सहाय्यक प्रवीण निकम, संगणक चालक विशाल गवळे व श्रावण जगदेव यांचीही प्रमुख उपस्थिती होती.
कार्यक्रमाचे सूत्रसंचालन आणि उपस्थितांचे आभार प्रा. स्वप्निल जैन यांनी मानले.
