पढावद : पढावद गावातील विद्यार्थी, महिला, ज्येष्ठ नागरिक व ग्रामस्थांची प्रवासाची गैरसोय दूर व्हावी, तसेच शिंदखेडा–बेटावद–मुडावद–पढावद बससेवा नियमित सुरू करण्यात यावी आणि पूर्वी बंद पडलेली धुळे मुक्कामाची बस पुन्हा सुरू करावी, या मागणीसाठी सामाजिक कार्यकर्ते श्री. राहुल नामदेव ठाकरे यांच्यासह ग्रामस्थांनी सातत्याने पाठपुरावा सुरू ठेवला आहे.
याच मागणीसाठी आज, दिनांक १२ ऑक्टोबर २०२६ रोजी ग्रामपंचायत पढावद यांच्या माध्यमातून धुळे विभाग नियंत्रक, महाराष्ट्र राज्य मार्ग परिवहन महामंडळ यांना दुसरे निवेदन सादर करण्यात आले.
पढावद येथून शिंदखेडा व धुळे येथे शिक्षण, नोकरी, व्यवसाय, वैद्यकीय उपचार तसेच इतर कामांसाठी जाणाऱ्या नागरिकांना नियमित बससेवा नसल्यामुळे मोठ्या अडचणींचा सामना करावा लागत आहे. विशेषतः विद्यार्थ्यांना शाळा-महाविद्यालयात जाण्यासाठी आणि महिलांसह ज्येष्ठ नागरिकांना प्रवासासाठी गैरसोय सहन करावी लागत आहे. त्यामुळे शिंदखेडा–बेटावद–मुडावद–पढावद बससेवा नियमित सुरू करावी, तसेच धुळे मुक्कामाची बस पूर्वीप्रमाणे पुन्हा सुरू करावी, अशी मागणी निवेदनाद्वारे करण्यात आली.
या वेळी श्री. बाळू ठाकरे, श्री. गणेश ठाकरे, श्री. देविदास ठाकरे आणि सामाजिक कार्यकर्ते श्री. राहुल नामदेव ठाकरे उपस्थित होते.
पढावद गावातील नागरिकांच्या प्रवासाचा प्रश्न मार्गी लागावा आणि विद्यार्थ्यांसह सर्वसामान्य ग्रामस्थांना नियमित एसटी बससेवेचा लाभ मिळावा, यासाठी राहुल ठाकरे यांचा सातत्यपूर्ण प्रयत्न सुरू असून, संबंधित एसटी प्रशासनाने या मागणीची गांभीर्याने दखल घेऊन लवकरात लवकर बससेवा सुरू करावी, अशी अपेक्षा ग्रामस्थांकडून व्यक्त होत आहे.
