सरदार वल्लभभाई पटेल यांच्या १५१ व्या जयंतीनिमित्त गुजरातमधील मुख्य कार्यक्रमाचे थेट प्रक्षेपण
पातूर (प्रतिनिधी) : भारताचे लोहपुरुष, देशाचे पहिले उपपंतप्रधान व गृहमंत्री सरदार वल्लभभाई पटेल यांच्या १५१ व्या जयंतीनिमित्त ३१ ऑक्टोबर रोजी देशभरात राष्ट्रीय एकता दिवस साजरा करण्यात आला. यानिमित्त अकोला जिल्हा पोलीस दलांतर्गत येणाऱ्या पातूर पोलीस स्टेशनमध्येही राष्ट्रीय एकता दिवस उत्साहात साजरा करण्यात आला.
यावेळी गुजरात येथे आयोजित करण्यात आलेल्या सरदार वल्लभभाई पटेल यांच्या जयंतीनिमित्ताच्या मुख्य कार्यक्रमाचे थेट प्रक्षेपण पातूर पोलीस स्टेशनमध्ये दाखविण्यात आले. ठाणेदार रामकृष्ण जाधव यांच्यासह पोलीस अधिकारी, कर्मचारी आणि उपस्थितांनी या कार्यक्रमाचे थेट प्रक्षेपण पाहिले.
सरदार वल्लभभाई पटेल यांनी स्वातंत्र्यानंतर देशातील विविध संस्थानांचे विलीनीकरण करून अखंड भारताच्या निर्मितीत महत्त्वपूर्ण योगदान दिले. त्यांच्या कार्याचा गौरव करण्यासाठी तसेच देशाची एकता, अखंडता आणि सुरक्षितता टिकवून ठेवण्याचा संकल्प करण्यासाठी दरवर्षी ३१ ऑक्टोबर हा दिवस राष्ट्रीय एकता दिवस म्हणून साजरा केला जातो.
या उपक्रमाच्या माध्यमातून पोलीस अधिकारी आणि कर्मचाऱ्यांनी राष्ट्रीय एकात्मता, बंधुभाव आणि देशसेवेच्या मूल्यांचे स्मरण केले. सरदार वल्लभभाई पटेल यांच्या विचारांचा आदर्श घेऊन देशाची एकता व अखंडता कायम राखण्याचा संदेश यावेळी देण्यात आला.
पातूर पोलीस स्टेशनमध्ये आयोजित या कार्यक्रमातून देशभक्ती आणि राष्ट्रीय एकात्मतेचा संदेश देण्यात आला.
