राष्ट्रीय एकता दिन व सरदार वल्लभभाई पटेल जयंतीनिमित्त आयोजन; केंद्रीय मंत्री पीयूष गोयल यांच्यासह भाजपचे अनेक नेते सहभागी
मुंबई (भारत कवितके, कांदिवली पश्चिम) : राष्ट्रीय एकता दिन आणि लोहपुरुष सरदार वल्लभभाई पटेल यांच्या जयंतीनिमित्त ३१ ऑक्टोबर २०२६ रोजी भाजप उत्तर मुंबई जिल्ह्याच्या वतीने बोरिवली ते कांदिवलीदरम्यान भव्य पदयात्रेचे आयोजन करण्यात आले होते. सायंकाळी ४ ते रात्री ८ वाजेपर्यंत ही पदयात्रा उत्साहात पार पडली.
बोरिवली येथील स्वामी विवेकानंद यांच्या पुतळ्यापासून पदयात्रेला सुरुवात झाली. एस. व्ही. रोड मार्गे कांदिवली पश्चिम येथील पोयसर परिसरातील सप्ताह मैदानापर्यंत पदयात्रा काढण्यात आली. या पदयात्रेत उत्तर मुंबईचे खासदार व केंद्रीय मंत्री पीयूष गोयल, भाजप उत्तर मुंबई जिल्हाध्यक्ष तथा नगरसेवक बाळा तावडे, आमदार योगेश सागर, माजी खासदार गोपाळ शेट्टी, आमदार मनीषा चौधरी, आमदार संजय उपाध्याय, आमदार प्रकाश सुर्वे, प्रवीण दरेकर, आमदार अतुल भातखळकर, विनोद शेलार यांच्यासह भाजपचे अनेक पदाधिकारी व कार्यकर्ते सहभागी झाले होते.
‘लोकतंत्र बचाओ, अराजकता हटाओ’ हा मुख्य उद्देश समोर ठेवून या पदयात्रेचे आयोजन करण्यात आले होते. पदयात्रेच्या मार्गावर विविध ठिकाणी नागरिकांनी उत्स्फूर्त प्रतिसाद देत स्वागत केले. महिला व पुरुष पदाधिकारी, कार्यकर्ते तसेच नागरिकांनी मोठ्या संख्येने सहभाग नोंदविला.
कांदिवली पश्चिम येथील सप्ताह मैदानावर पदयात्रेची सांगता झाली. यावेळी उपस्थित मान्यवरांनी मार्गदर्शन केले. त्यानंतर राष्ट्रगीताने कार्यक्रमाचा समारोप करण्यात आला.
या कार्यक्रमाचे वृत्तसंकलन ‘सारथी महाराष्ट्राचा’चे मुंबई प्रतिनिधी भारत कवितके यांनी केले.
