फूट ओव्हर ब्रिजच्या गर्डर टाकण्याचे काम; कॉसमॉस ते हिलक्रेस्ट सोसायटीदरम्यानची थेट जोडणी बंद, पर्यायी मार्गांचा वापर करण्याचे आवाहन
ठाणे (प्रतिनिधी) : घोडबंदर रोडवरील ब्रह्मांड जंक्शन येथे मुंबई महानगर प्रदेश विकास प्राधिकरणामार्फत (MMRDA) पादचारी उड्डाणपुलाच्या (फूट ओव्हर ब्रिज) गर्डर टाकण्यासह विविध पायाभूत सुविधांची कामे हाती घेण्यात आली आहेत. या कामासाठी १ नोव्हेंबर २०२६ ते ३० सप्टेंबर २०२८ या कालावधीत ब्रह्मांड जंक्शन परिसरातील संबंधित रस्ता वाहतुकीसाठी पूर्णपणे बंद ठेवण्यात येणार आहे.
या वाहतूक बदलामुळे कॉसमॉस सोसायटी ते हिलक्रेस्ट सोसायटीदरम्यानची अंतर्गत रस्त्याची जोडणी तसेच जंक्शनवरील थेट मार्ग बंद राहणार आहे. त्यामुळे या परिसरातून प्रवास करणाऱ्या वाहनचालकांना पर्यायी मार्गांचा वापर करावा लागणार आहे.
ठाणे वाहतूक पोलिसांनी प्रवाशांची गैरसोय टाळण्यासाठी पर्यायी मार्ग निश्चित केले आहेत. वाहनचालकांनी टीसीएस सर्कल, वाघबीळ नाका तसेच परिसरातील लगतच्या अंतर्गत टाऊनशिप रस्त्यांचा वापर करून प्रवास करण्याचे आवाहन करण्यात आले आहे.
दरम्यान, स्थानिक नागरिकांच्या माहितीनुसार, अधिकृत कामकाज सुरू होण्याच्या तारखेपूर्वीच परिसरात कामाला सुरुवात झाली असून बॅरिकेडिंग करण्यात आले आहे. त्यामुळे वाहतुकीवर परिणाम जाणवू लागला आहे. विशेषतः गर्दीच्या वेळेत घोडबंदर रोडवरील मुख्य मार्गिकेवर वाहनांचा वेग मंदावण्याची शक्यता आहे.
या पार्श्वभूमीवर वाहनचालकांनी घराबाहेर पडण्यापूर्वी वाहतुकीची सद्यस्थिती तपासावी, पर्यायी मार्गांचा वापर करावा आणि वाहतूक पोलिसांच्या सूचनांचे पालन करावे, असे आवाहन करण्यात येत आहे.
