जखमींपैकी काहींना पुढील उपचारासाठी नांदेडला हलविले; कुत्र्याच्या शोधासाठी नगरपालिकेचे आरोग्य पथक सज्ज
उमरखेड (प्रतिनिधी) : उमरखेड शहरात भटक्या कुत्र्यांचा उपद्रव दिवसेंदिवस वाढत असून, एका पिसाळलेल्या कुत्र्याने शहरातील तब्बल २० जणांना चावा घेतल्याची घटना समोर आली आहे. या घटनेमुळे नागरिकांमध्ये भीतीचे वातावरण निर्माण झाले आहे.
शाळकरी मुले, महाविद्यालयीन विद्यार्थी तसेच शिकवणी वर्गासाठी जाणाऱ्या लहान मुला-मुलींना भटक्या कुत्र्यांच्या दहशतीचा सामना करावा लागत आहे. रस्त्याने ये-जा करणाऱ्या नागरिकांनाही कुत्र्यांच्या हल्ल्याची भीती सतावत आहे.
या घटनेत जखमी झालेल्या काही नागरिकांना पुढील उपचारासाठी नांदेड येथे हलविण्यात आले असून, इतर काही जखमींवर जिल्हा उपरुग्णालयात उपचार सुरू आहेत.
दरम्यान, पिसाळलेल्या कुत्र्याचा शोध घेण्यासाठी नगरपालिकेच्या आरोग्य विभागाचे पथक सज्ज झाले आहे. नागरिकांच्या सुरक्षिततेच्या दृष्टीने संबंधित विभागाकडून शोधमोहीम राबविण्यात येत आहे.
भटक्या कुत्र्यांचा तातडीने बंदोबस्त करण्याची मागणी
शहरातील भटक्या कुत्र्यांची वाढती संख्या आणि नागरिकांवरील हल्ल्यांच्या घटनांमुळे नगरपालिका प्रशासनाने तातडीने उपाययोजना कराव्यात, अशी मागणी नागरिकांकडून होत आहे. विशेषतः शाळकरी मुले, महिला, ज्येष्ठ नागरिक आणि पादचाऱ्यांच्या सुरक्षिततेचा प्रश्न ऐरणीवर आला आहे.
नगरपालिका प्रशासनाने या समस्येकडे गांभीर्याने लक्ष देऊन भटक्या तसेच पिसाळलेल्या कुत्र्यांचा शोध घेऊन योग्य ती कार्यवाही करावी आणि नागरिकांना दिलासा द्यावा, अशी अपेक्षा व्यक्त होत आहे.
