मूल्यवर्धन विषयावर शिक्षकांना मार्गदर्शन; चार शिक्षकांचा शाल, श्रीफळ, फेटा व सन्मानचिन्ह देऊन गौरव
भांबर्डे : रांजणगाव गणपती केंद्रांतर्गत भांबर्डे येथील जिल्हा परिषद प्राथमिक शाळेत नुकतीच शिक्षण परिषद उत्साहात संपन्न झाली. या परिषदेत मूल्यवर्धन या विषयावर शिक्षकांना मार्गदर्शन करण्यात आले. तसेच आपल्या प्रदीर्घ शैक्षणिक सेवेतून विद्यार्थ्यांचे भविष्य घडविणाऱ्या चार सेवानिवृत्त शिक्षकांचा मान्यवरांच्या हस्ते सन्मान करून त्यांच्या कार्याचा गौरव करण्यात आला.
शिक्षण परिषदेत सय्यद सर आणि चोले सर यांनी मूल्यवर्धन विषयावर मार्गदर्शन केले. केंद्रप्रमुख तानाजी पाटील यांनीही शिक्षकांना मार्गदर्शन करत शैक्षणिक कार्यातील मूल्यांचे महत्त्व अधोरेखित केले.
यावेळी भांबर्डे जिल्हा परिषद शाळेचे मुख्याध्यापक नानाभाऊ नाणेकर यांचा सेवानिवृत्तीनिमित्त शाल, श्रीफळ, फेटा आणि मूर्ती देऊन सन्मान करण्यात आला. तसेच रांजणगाव गणपती केंद्रातील नाथा वीर, सरला फुंदे मॅडम आणि स्मिता कुलकर्णी मॅडम यांचाही सेवानिवृत्तीनिमित्त गौरव करण्यात आला. केंद्रप्रमुख तानाजी पाटील आणि भांबर्डे शाळा व्यवस्थापन समितीच्या हस्ते चारही मान्यवरांचा सन्मान करण्यात आला.
या कार्यक्रमाला भांबर्डे शाळा व्यवस्थापन समितीचे अध्यक्ष श्री. पवार, माजी सरपंच गोरख मस्के, पोलीस पाटील, शाळा व्यवस्थापन समितीचे पदाधिकारी, वरुडे येथील ग्रामस्थ व समिती पदाधिकारी, पोलीस पाटील शेवाळे, पावशे सर, संगीता पळसकर, मुख्याध्यापक नामदेव गायकवाड यांच्यासह केंद्रातील शिक्षक आणि ग्रामस्थ मोठ्या संख्येने उपस्थित होते.
यावेळी संतोष शेवाळे, नामदेव गायकवाड, सौ. विजया तळोले, शर्मिला निचीत, पावशे सर, पोलीस पाटील शेवाळे आणि आप्पासाहेब देशमुख यांनी मनोगत व्यक्त करून सेवानिवृत्त शिक्षकांच्या शैक्षणिक योगदानाचा गौरव केला.
सत्काराला उत्तर देताना नानाभाऊ नाणेकर सर आणि नाथा वीर सर यांनी आपल्या सेवाकाळातील अनुभव कथन केले. प्रामाणिकपणे आणि निष्ठेने सेवा केली तर त्याचे फळ निश्चितच मिळते, असे विचार त्यांनी व्यक्त केले. त्यांच्या अनुभवातून उपस्थित शिक्षकांना प्रेरणा मिळाली.
कार्यक्रमाचे सूत्रसंचालन अर्जुन निचीत सर यांनी केले, तर संजयकुमार वाळके सर यांनी आभार प्रदर्शन केले. शिक्षकांच्या प्रदीर्घ सेवाकार्याचा गौरव आणि शैक्षणिक मूल्यांची जपणूक अशा दुहेरी उद्देशाने हा कार्यक्रम उत्साहपूर्ण वातावरणात संपन्न झाला.
