साने गुरुजी शिक्षण संस्थेच्या सुवर्ण महोत्सवी वर्षानिमित्त उपक्रम; सहाय्यक पोलीस निरीक्षक शीतलकुमार डोईजड यांच्या हस्ते वितरण
प्रतिनिधी –
कुरुंदवाड : शिरोळ तालुक्यातील कुरुंदवाड येथील साने गुरुजी शिक्षण संस्थेच्या सुवर्ण महोत्सवी वर्षानिमित्त साने गुरुजी विद्यालयात विद्यार्थ्यांना ‘साधना बालकुमार’ दिवाळी अंकाचे वितरण करण्यात आले. कुरुंदवाड पोलीस ठाण्याचे सहाय्यक पोलीस निरीक्षक श्री. शीतलकुमार डोईजड यांच्या हस्ते विद्यार्थ्यांना दिवाळी अंकांचे वाटप करण्यात आले. कार्यक्रमाच्या अध्यक्षस्थानी संस्थेचे अध्यक्ष रावसाहेब उर्फ दा. आ. पाटील होते.
यावेळी संस्थेचे अध्यक्ष रावसाहेब पाटील यांनी साधना मासिकाचे महत्त्व विशद केले. एमपीएससीसारख्या स्पर्धा परीक्षांमध्ये साधना मासिकावर आधारित प्रश्न विचारले जातात, अशी माहिती देत त्यांनी विद्यार्थ्यांना नियमित वाचनाची सवय लावण्याचे आवाहन केले. वाचनामुळे ज्ञानात भर पडते आणि व्यक्तिमत्त्व विकासाला चालना मिळते, असेही त्यांनी सांगितले.
यावेळी पोलीस हवालदार श्री. भोसले यांनी विद्यार्थ्यांना सायबर गुन्हेगारीविषयी मार्गदर्शन केले. इंटरनेट आणि सोशल मीडियाचा वापर करताना घ्यावयाची काळजी तसेच ऑनलाइन फसवणुकीपासून सुरक्षित राहण्याबाबत त्यांनी माहिती दिली. होमगार्ड श्री. पाटील यांनी मार्गदर्शन करताना आई-वडिलांप्रमाणेच शिक्षकही आपल्या जीवनात वंदनीय असतात, असे सांगून शिक्षकांचा आदर करण्याचे महत्त्व पटवून दिले.
कार्यक्रमाच्या प्रारंभी मान्यवरांच्या हस्ते साने गुरुजी यांच्या प्रतिमेचे पूजन करण्यात आले. त्यानंतर विद्यार्थ्यांना ‘साधना बालकुमार’ दिवाळी अंकांचे वितरण करण्यात आले. सहाय्यक शिक्षिका सौ. संजीवनी निर्मळे यांनी स्वागत व प्रास्ताविक केले. कार्यक्रमाचे सूत्रसंचालन श्री. जमीर मुल्ला यांनी केले, तर श्री. अमोल मस्के सर यांनी आभार मानले.
या प्रसंगी संस्थेचे उपाध्यक्ष प्रभाकर भाऊराव कनवाडकर, सचिव अजित पाटील, संस्थेचे सर्व संचालक व संचालिका, विद्यालयाचे मुख्याध्यापक किरण पाटील, ज्येष्ठ शिक्षक सचिन गुदले, विजय माळी, दीपक चौगुले यांच्यासह विद्यार्थी-विद्यार्थिनी, शिक्षक आणि शिक्षकेतर कर्मचारी मोठ्या संख्येने उपस्थित होते.
संस्थेच्या सुवर्ण महोत्सवी वर्षानिमित्त आयोजित या उपक्रमातून विद्यार्थ्यांमध्ये वाचनसंस्कृती रुजविण्यासोबतच सामाजिक जागरूकता आणि ज्ञानाची आवड निर्माण करण्याचा संदेश देण्यात आला.
