मृत भावाला न्याय मिळावा म्हणून लहान भावाने टिपली आई-वडिलांची व्यथा; भिसे कुटुंबीयांचे दहा दिवसांपासून उपोषण
प्रतिनिधी
सातारा : एका चिमुकल्याचा अपघाती मृत्यू झाला आणि कुटुंबातील हसते-खेळते बालपण कायमचे हरपले. आई-वडिलांच्या डोळ्यांतील अश्रू थांबण्याचे नाव घेत नाहीत. आपल्या लेकराला न्याय मिळावा, या मागणीसाठी आई-वडील गेल्या दहा दिवसांपासून जिल्हाधिकारी कार्यालयासमोर उपोषणाला बसले आहेत. मात्र, त्यांच्या मागण्यांकडे अपेक्षित गांभीर्याने लक्ष दिले जात नसल्याचा आरोप कुटुंबीयांकडून होत आहे.
या परिस्थितीत आपल्या मृत भावाला न्याय मिळावा आणि आई-वडिलांची व्यथा लोकांपर्यंत पोहोचावी, यासाठी मृत चिमुकल्याच्या लहान भावाने पुढाकार घेतला. वडिलांचा मोबाईल हातात घेऊन त्याने कॅमेरा सुरू केला आणि आई-वडिलांच्या वेदना चित्रित करण्यास सुरुवात केली. आपल्या कुटुंबाची व्यथा जगासमोर मांडण्यासाठी या चिमुकल्याने केलेली धडपड पाहून उपस्थितांचे डोळे पाणावले. हातात मोबाईल घेऊन न्यायाच्या लढ्याला आवाज देणारा हा चिमुकला अनेकांच्या नजरेत खऱ्या अर्थाने बालपत्रकार ठरला.
वाई तालुक्यातील मांढरदेवी-बोपर्डी रस्त्यावर १४ ऑक्टोबर रोजी रात्री साडेनऊच्या सुमारास रस्ता ओलांडताना अनुज भिसे या चिमुकल्याचा अपघात होऊन दुर्दैवी मृत्यू झाला होता. मात्र, या घटनेला अनेक दिवस उलटूनही संबंधित रस्त्याच्या कामाबाबत आणि ठेकेदाराच्या जबाबदारीबाबत ठोस कारवाई झालेली नसल्याचा आरोप अनुजच्या कुटुंबीयांनी केला आहे.
अनुजला न्याय मिळावा, संबंधित रस्त्याच्या कामाची खातेनिहाय चौकशी व्हावी आणि दोषींवर कायद्यानुसार कारवाई करण्यात यावी, अशा मागण्या भिसे कुटुंबीयांनी केल्या आहेत. या मागण्यांसाठी कुटुंबीय आणि कार्यकर्ते गेल्या दहा दिवसांपासून अहोरात्र उपोषण करत आहेत.
मात्र, शासनाकडून अपेक्षित दखल घेतली जात नसल्याचे पाहून अखेर अनुजच्या लहान भावाने वडिलांचा मोबाईल हातात घेतला आणि आपल्या आई-वडिलांचा आक्रोश व व्यथा कॅमेऱ्यात टिपण्यास सुरुवात केली. मृत भावासाठी आणि न्यायाच्या प्रतीक्षेत असलेल्या आई-वडिलांसाठी या चिमुकल्याने केलेली ही धडपड उपस्थितांच्या मनाला चटका लावणारी ठरली.
