लोणी काळभोर पोलीस ठाण्याच्या वरिष्ठ पोलीस निरीक्षकपदी नियुक्ती; पुणे शहर पोलीस दलात सहा पोलीस निरीक्षकांच्या अंतर्गत बदल्या
लोणी काळभोर | प्रतिनिधी
पुणे शहर पोलीस दलात प्रशासकीय कारणास्तव मोठे फेरबदल करण्यात आले असून, लोणी काळभोर पोलीस ठाण्याच्या वरिष्ठ पोलीस निरीक्षकपदी समाधान सर्जेराव पवार यांची नियुक्ती करण्यात आली आहे. पोलीस आयुक्त अमितेश कुमार यांनी यासंदर्भातील अधिकृत आदेश जारी केला आहे.
या बदल्यानुसार लोणी काळभोर पोलीस ठाण्याचे विद्यमान वरिष्ठ पोलीस निरीक्षक प्रदीप नागनाथ पवार यांची खडक पोलीस ठाण्यात गुन्हे शाखेचे पोलीस निरीक्षक म्हणून बदली करण्यात आली आहे. त्यांच्या जागी खडक पोलीस ठाण्याच्या गुन्हे शाखेत कार्यरत असलेले समाधान पवार यांच्याकडे लोणी काळभोर पोलीस ठाण्याची जबाबदारी सोपविण्यात आली आहे.
वाढती लोकसंख्या आणि गुन्हेगारी रोखण्याचे आव्हान
पुणे-सोलापूर महामार्गावरील महत्त्वाचे केंद्र असलेल्या लोणी काळभोरसह कदमवाकवस्ती, थेऊर आणि परिसरातील वाढत्या लोकसंख्येमुळे या पोलीस ठाण्याचे महत्त्व अधिक वाढले आहे. या भागात शैक्षणिक संस्था आणि औद्योगिक वसाहतींची संख्या वाढत असल्याने कायदा व सुव्यवस्था राखण्याचे आव्हानही वाढले आहे.
वाढत्या शहरीकरणाच्या पार्श्वभूमीवर परिसरातील कायदा व सुव्यवस्था अबाधित राखणे, वाहतूक कोंडीवर नियंत्रण मिळवणे, तसेच सराईत गुन्हेगारांवर वचक ठेवणे ही नवनियुक्त वरिष्ठ पोलीस निरीक्षक समाधान पवार यांच्यासमोरील प्रमुख आव्हाने असणार आहेत.
पुणे शहर पोलीस दलात सहा निरीक्षकांच्या बदल्या
पुणे शहर पोलीस दलातील एकूण सहा पोलीस निरीक्षकांच्या अंतर्गत बदल्या करण्यात आल्या आहेत. यामध्ये बंडगार्डन, लष्कर आणि लोणी काळभोर या तीन महत्त्वाच्या पोलीस ठाण्यांना नवीन वरिष्ठ पोलीस निरीक्षक मिळाले आहेत.
बदली झालेल्या सर्व संबंधित अधिकाऱ्यांनी तातडीने नवीन नेमणुकीच्या ठिकाणी हजर होऊन कार्यभार स्वीकारावा, असे निर्देश पोलीस आयुक्तांनी दिले आहेत.
