जिल्हाधिकारी वर्षा मीना यांच्या उपस्थितीत पार पडलेल्या स्पर्धेत यश; राज्यस्तरीय विकसित भारत युवा संसदेसाठी अकोला जिल्ह्याचे प्रतिनिधित्व करण्याची संधी
पातूर | प्रतिनिधी :
अकोला जिल्हास्तरीय विकसित भारत युवा संसद २०२७ मध्ये प्रज्वल इंगळे यांनी प्रभावी भाषण सादर करत तृतीय क्रमांक पटकावला. या यशामुळे महाराष्ट्र राज्यस्तरीय विकसित भारत युवा संसद २०२७ मध्ये अकोला जिल्ह्याचे प्रतिनिधित्व करण्याची संधी त्यांना मिळाली असून, आता त्यांची वाटचाल मुंबईकडे सुरू झाली आहे.
मेरा युवा भारत केंद्र, अकोला (MY Bharat), युवा कार्य व क्रीडा मंत्रालय, भारत सरकार आणि श्री शिवाजी एज्युकेशन सोसायटीचे कॉलेज ऑफ इंजिनिअरिंग अँड टेक्नॉलॉजी यांच्या संयुक्त विद्यमाने १७ नोव्हेंबर २०२६ रोजी बाभूळगाव, अकोला येथील सर विश्वेश्वरय्या सभागृहात या कार्यक्रमाचे आयोजन करण्यात आले होते.
या कार्यक्रमाला अकोला जिल्हाधिकारी तथा जिल्हादंडाधिकारी सौ. वर्षा मीना (IAS), जिल्हा युवा अधिकारी अक्षय निपाणे, महाविद्यालयाचे प्राचार्य डॉ. पी. व्ही. थोरात आणि NSS कार्यक्रम अधिकारी डॉ. व्ही. आर. ठाकरे उपस्थित होते. कार्यक्रमाची सुरुवात स्वागत व दीपप्रज्वलनाने झाली. त्यानंतर मान्यवरांचा सत्कार, जिल्हा युवा अधिकाऱ्यांचे प्रास्ताविक, जिल्हाधिकाऱ्यांचे अध्यक्षीय मार्गदर्शन, प्राचार्यांचे मनोगत आणि आभारप्रदर्शन झाले. दुपारी १२ वाजल्यापासून भाषण स्पर्धेला सुरुवात झाली.
‘नशामुक्त युवा – विकसित भारत’ या विषयावर प्रज्वल इंगळे यांनी व्यसनमुक्त समाजाची आवश्यकता, युवकांची सामाजिक जबाबदारी, शिक्षण, जनजागृती आणि २०४७ च्या विकसित भारताच्या निर्मितीत युवकांचे योगदान या मुद्द्यांवर अभ्यासपूर्ण विचार मांडले.
विषयज्ञान, नावीन्यपूर्ण विचार, भाषणाची मांडणी, आत्मविश्वास, देहबोली, वेळेचे नियोजन आणि भाषा अशा विविध निकषांवर परीक्षकांनी मूल्यांकन केले. या मूल्यांकनात प्रज्वल इंगळे यांनी तृतीय क्रमांक मिळवला. त्यांना सन्मानचिन्ह आणि गुणवत्ता प्रमाणपत्र देऊन गौरविण्यात आले.
प्रज्वल इंगळे हे गेल्या अनेक वर्षांपासून सामाजिक कार्य, युवकांचे प्रश्न, सामाजिक जनजागृती आणि समाजहिताच्या विविध उपक्रमांमध्ये सक्रिय आहेत. युवकांना योग्य दिशा मिळावी, त्यांच्या विचारांना व्यासपीठ मिळावे आणि सामाजिक परिवर्तनात तरुणांचा सहभाग वाढावा, यासाठी ते सातत्याने प्रयत्नशील आहेत. त्यांच्या या सामाजिक जाणीवेचे प्रतिबिंब त्यांच्या भाषणातूनही दिसून आले.
जिल्हास्तरीय स्पर्धेतील यशानंतर आता मुंबई येथे होणाऱ्या महाराष्ट्र राज्यस्तरीय विकसित भारत युवा संसद २०२७ मध्ये अकोला जिल्ह्याचे प्रतिनिधित्व करण्यासाठी प्रज्वल इंगळे सज्ज झाले आहेत.
“व्यसनमुक्त युवक हीच विकसित भारताची खरी ताकद; युवकांच्या विचारांत परिवर्तनाची क्षमता आणि कृतीत राष्ट्रनिर्मितीचे सामर्थ्य असते!”
प्रज्वल इंगळे यांच्या या यशाबद्दल सर्व स्तरांतून त्यांचे अभिनंदन होत असून, आगामी राज्यस्तरीय स्पर्धेतील त्यांच्या कामगिरीकडे सर्वांचे लक्ष लागले आहे.










