उपस्थित महिलांच्या हस्ते पूर्णाकृती प्रतिमेला पुष्पहार अर्पण; मान्यवरांनी व्यक्त केले विचार
दीपनगर | प्रतिनिधी :
भारताच्या पहिल्या महिला पंतप्रधान तथा माजी पंतप्रधान इंदिरा गांधी यांची जयंती दीपनगर येथील साने गुरुजी सार्वजनिक वाचनालयात उत्साहात साजरी करण्यात आली. यावेळी उपस्थित महिलांच्या हस्ते इंदिरा गांधी यांच्या प्रतिमेला पुष्पहार अर्पण करून अभिवादन करण्यात आले.
इंदिरा गांधी यांचा जन्म १९ नोव्हेंबर १९१७ रोजी प्रयागराज येथे झाला. त्या भारताच्या तिसऱ्या आणि पहिल्या महिला पंतप्रधान होत्या. आणीबाणीच्या काळात देशासमोर निर्माण झालेल्या संकटांचा सामना करण्यासाठी त्यांनी आर्थिक आणि मानसिक धैर्य दाखवले, असे प्रतिपादन वाचनालयाच्या ग्रंथपाल सौ. कविता पाटील यांनी आपल्या भाषणातून केले.
या कार्यक्रमाला वाचनालयाचे उपाध्यक्ष सचिन भिरूड, सचिव एस. एम. पाटील, कोषाध्यक्ष अरुण शिंदे, संचालक मनोहर बाऱ्हे, बाबा जावळे, ग्रंथपाल सौ. कविता पाटील, लिपिक मोनाली फालक आणि शिपाई प्रवीण बोदडे उपस्थित होते.









