ज्येष्ठ मतदारांचा सन्मान: टाकळी इसापूर येथे उत्साहात मतदान प्रक्रिया सुरू

गणेश राठोड
उमरखेड प्रतिनिधी :-

२० नोव्हेंबर २०२४: आज उमरखेड-महागाव विधानसभेच्या मतदान प्रक्रियेत टाकळी इसापूर बूथ क्रमांक ११८ येथे एक आगळावेगळा प्रसंग पाहायला मिळाला. मतदान हा लोकशाहीचा उत्सव असून, प्रत्येक नागरिकाला आपला हक्क बजावण्याचा अधिकार आहे. या अनुषंगाने, मतदानासाठी आलेल्या ज्येष्ठ नागरिकांचा सन्मान करून त्यांना प्रेरित करण्याचा अभिनव उपक्रम राबविण्यात आला.

टाकळी येथील पोलीस पाटील संतोश देशेवाड बी.एल. ओ यंशवत पाटील यांच्यासह गणेश राठोड (ग्रामपंचायत संगणक परिचालक),अंगणवाडी सेविकांनी मतदान केंद्रावर येणाऱ्या ज्येष्ठ मतदारांचे औक्षण करून, पुष्पगुच्छ देऊन त्यांचे स्वागत केले. हा अनोखा उपक्रम पाहून परिसरातील नागरिकांमध्ये एक सकारात्मक संदेश पसरला. ज्येष्ठ नागरिक हे आपल्या समाजाचे मार्गदर्शक आहेत, त्यांनी ज्या पद्धतीने उत्साहाने मतदानाला उपस्थिती लावली, त्यामुळे इतर नागरिकांना प्रोत्साहन मिळाले.

या प्रसंगी, काही ज्येष्ठ नागरिकांनी आपल्या अनुभवांची मांडणी केली. ८० वर्षीय नारायन आवळे यांनी सांगितले, “आपण कितीही वयस्कर झालो तरी आपला मतदानाचा हक्क बजावला पाहिजे. आजच्या पिढीने यामध्ये पुढाकार घेतला पाहिजे.” अशाच प्रकारे, ७५ वर्षीय काताबाई . टाळीकूठे यांनीही आपल्या भावना व्यक्त करत म्हटले, “मतदान हा आपला हक्कच नाही, तर कर्तव्य आहे. तरुणांनी त्याचे महत्त्व ओळखले पाहिजे.”

पोलीस पाटील बी.एल. ओ . यांनी या उपक्रमाचे महत्व सांगितले. त्यांनी म्हटले, “लोकशाहीचा पाया मजबूत ठेवण्यासाठी मतदान आवश्यक आहे. आजच्या उपक्रमाने तरुणांमध्ये मतदानाविषयी जागरूकता वाढेल, अशी आम्हाला आशा आहे.” ग्रामपंचायत संगणक परिचालक,अंगणवाडी सेविका, सामाजिक कार्यकर्ते, आणि इतर ग्रामस्थांनी एकत्रितपणे ज्येष्ठ मतदारांना आदर व्यक्त करत मतदान केंद्रावरचा हा दिवस संस्मरणीय बनवला.

या प्रसंगाचे महत्व अधोरेखित करत टाकळी इसापूरच्या नागरिकांनी सांगितले की, अशा उपक्रमांमुळे केवळ मतदानाचे प्रमाण वाढत नाही, तर समाजात एकजुटीचाही संदेश पोहोचतो.

उमरखेड-महागाव विधानसभेत आजच्या या आगळ्यावेगळ्या उपक्रमामुळे लोकांमध्ये मतदानाच्या प्रक्रियेबद्दलचा आदर आणि समज अधिक दृढ झाली आहे. अशा उपक्रमांनी संपूर्ण समाजाला मतदानासाठी प्रेरित करण्याचे कार्य साध्य होईल, अशी अपेक्षा व्यक्त होत आहे