डहाणूतील चळणी जामधापाडा येथे आगीचा कहर: कुटुंबाची सर्व संपत्ती जळून खाक

भरत पुंजारा
ग्रामीण प्रतिनिधी पालघर

पालघर- डहाणू तालुक्यातील चळणी जामधापाडा येथे एका कुटुंबाच्या घराला आग लागल्यामुळे मोठे नुकसान झाले आहे. या दुर्घटनेत घरातील सर्व सामान, धान्य, रोख रक्कम आणि शेतीमाल आगीच्या भक्ष्यस्थानी पडले. सुदैवाने, कुटुंबातील सदस्य त्या वेळी शेतावर असल्यामुळे कोणतीही जीवितहानी झाली नाही.
मंजी नवश्या गिंभल यांच्या सात सदस्यांचे कुटुंब या आगीत आपले सर्वस्व गमावून बसले आहे. कुटुंबीयांच्या म्हणण्यानुसार, स्वयंपाकानंतर चुलीतील आग व्यवस्थित विझवली गेली नसल्यामुळे ती पुन्हा पेटल्याचा संशय आहे. मात्र, नेमके कारण अद्याप स्पष्ट झालेले नाही.
जळून गेलेले सामान: उडीद, चवळी, गहू, भुईमूग शेंगा, मिरची यांसारखी धान्ये, ₹19,000 रोख रक्कम, घरातील सर्व साहित्य जळून खाक झाले.घर आणि शेतीचे नुकसान भरून न निघणारे असून कुटुंब आर्थिक संकटात सापडले आहे.
आगीत कुटुंबाचे संपूर्ण जीवन उद्ध्वस्त झाले असून, अन्नधान्य आणि जीवनावश्यक वस्तूंची कमतरता भासत आहे. आर्थिक पाठबळ नसल्यामुळे घराच्या पुनर्बांधणीसह दैनंदिन गरजा भागवणे अवघड झाले आहे.
या परिस्थितीत स्थानिक प्रशासन, सामाजिक संस्था आणि दानशूर व्यक्तींनी पुढे येऊन या कुटुंबाला तातडीने मदत करणे गरजेचे आहे. जीवनावश्यक वस्तू, आर्थिक सहाय्य आणि घराच्या पुनर्बांधणीसाठी सहकार्य मिळाल्यास कुटुंबाला नव्याने उभे राहण्यास मदत होईल.
ही घटना प्रशासन आणि स्थानिक लोकांनी गांभीर्याने घेतली पाहिजे, कारण अशा प्रकारच्या घटनांमुळे ग्रामीण भागातील कुटुंबे मोठ्या संकटात सापडतात.