शिक्षणमहर्षी कर्मवीर रामरावजी आहेर यांचा ३१वा स्मृतिदिन समारंभ संपन्न

देवळा प्रतिनिधी- भारत पवार प्रत्येक व्यक्तीमध्ये प्रचंड ऊर्जा असते ती ओळखून विद्यार्थ्यांनी संशोधन क्षेत्रासह नवनिर्मितीत रस घ्यावा.यामुळे देशाच्या प्रगतीत आपलाही हातभार लागेल.मात्र त्यासाठी आंतरिक इच्छाशक्ती जागी असावी व प्रतिकूल परिस्थितीवर मात करण्याची उर्मी असावी असे प्रतिपादन मानवधन सामाजिक व शैक्षणिक संस्थेचे संस्थापक मा.प्रकाश कोल्हे साहेब यांनी केले.
देवळा एज्युकेशन सोसायटी,देवळा च्या प्रांगणात बुधवार दि.१ जानेवारी,२०२५ रोजी आयोजित कर्मवीर रामरावजी (अण्णासाहेब) आहेर यांच्या ३१ व्या स्मृतिदिन कार्यक्रमात प्रमुख पाहुणे म्हणून बोलत होते.देवळा एज्युकेशन सोसायटीचे चेअरमन व प्राचार्य डॉ.हितेंद्र आहेर (बापूसाहेब) हे कार्यक्रमाच्या अध्यक्षस्थानी होते.
मा.प्रकाश कोल्हे साहेब यांनी स्वतःचा खडतर जीवनमार्ग सांगताना किती संघर्ष करावा लागला यावरही भाष्य केले.यावेळी शैक्षणिक व साहित्यिक क्षेत्रात विशेष योगदान दिलेल्या स्त्रीवादी लेखिका डॉ.मंगला वरखेडे मॅडम यांचा संस्थेच्या वतीने सन्मानपत्र देत त्यांच्या कार्याचा गौरव केला. या सन्मानास उत्तर देताना त्या म्हणाल्या की,विद्यार्थ्यांनी मोबाईल ऐवजी पुस्तक वाचनाचा आग्रह धरावा व वाचनसंस्कृती जोपासावी. यामुळे जीवनाला योग्य गती व दिशा मिळेल.या दरम्यान संस्थेच्या देवळा महाविद्यालयाच्या २०२३-२४ च्या ‘बांधिलकच्या वाटचाल’ या नियतकालिकाचे प्रकाशन ज्येष्ठ समीक्षक डॉ.रमेश वरखेडे सर यांच्या हस्ते करण्यात आले. याबाबत बोलताना ते म्हणाले की, दरवर्षी वेगवेगळे विषय हाताळत विद्यार्थ्यांना लिहिते करण्याचा हा स्तुत्य उपक्रम असून याचे वाङमयमूल्य मोठे आहे.

यावेळी संस्थेच्या व्हा.चेअरमन श्रीमती आक्कासाहेब आहेर,सचिव प्रोफेसर डॉ.मालतीताई आहेर मॅडम, प्रशासकीय अधिकारी प्रा.बापू रौंदळ सर,मुख्याध्यापिका सुनीता पगार मॅडम, मुख्याध्यापक श्री.संजय पगार सर आदी मान्यवर व्यासपीठावर उपस्थित होते.प्रारंभी जिजामाता कन्या विद्यालयाच्या विद्यार्थीनींनी स्वागतगीत सादर केले.उपप्राचार्य डॉ.जयवंत भदाणे सर यांनी प्रमुख पाहुण्यांचा परिचय दिला.
कर्मवीर अण्णासाहेब आहेर यांच्या स्मृतिप्रीत्यर्थ विज्ञानप्रदर्शन,रांगोळीप्रदर्शन, चित्रप्रदर्शन,इंग्लिश,गणित प्रोजेक्ट प्रेझेंटेशन यांचे उद्घाटन प्रमुख पाहुणे मा.प्रकाश कोल्हे,मा.विजय वरखेडे व मविप्रचे संचालक श्री.विजय पगार व माजी उपनगराध्यक्ष श्री.लक्ष्मीकांत आहेर यांच्या हस्ते करण्यात आले. अहवाल वाचन मुख्याध्यापिका श्रीमती सुनीता पगार मॅडम यांनी केले व विविध स्पर्धांत उल्लेखनीय यश मिळवणाऱ्यांना,तसेच शिक्षकांसाठी आयोजित केलेल्या संस्थेचा इतिहास लेखन स्पर्धतील विजेत्यांना पाहुण्यांच्या हस्ते बक्षिसे व प्रमाणपत्र देण्यात आली. श्री.डी.वाय.भदाणे सर व श्री.एस.टी.पाटील सर यांनी पारितोषिक वितरणाचे संयोजन केले.यावेळी ज्येष्ठ साहित्यिक डॉ.एकनाथ पगार सर,उपप्राचार्य डॉ.डी.के.आहेर सर उपप्राचार्य रामदास निकम सर,पर्यवेक्षक श्री.कौतिक खोंडे सर,पर्यवेक्षिका मनिषा आहेर मॅडम,भुयाणे येथील प्रगतिशील शेतकरी श्री.खंडू शेवाळे, माजी खेळाडू श्री.दिलीप सोनवणे यांच्यासह महाविद्यालय व माध्यमिक विद्यालयाचे शिक्षक-शिक्षकेतर कर्मचारी उपस्थित होते.कार्यक्रमाचे सूत्रसंचालन संस्थेचे प्रशासकीय अधिकारी प्रा.बी.के.रौदळ सर यांनी केले तर मुख्याध्यापक श्री.संजय पगार सर यांनी आभार मानले.व ब्राईट इंग्लिश मिडीयम स्कूल च्या प्रिन्सिपल लीना अहिरराव मॅडम यांनी पसायदानाने कार्यक्रमाची सांगता केली.