शिरूर पोलिसांची धडक कारवाई : ६० लाखांची गोवा बनावटीची दारू जप्त, मोठ्या रॅकेटचा पर्दाफाश..!

शिरूर तालुका प्रतिनिधी:-

शिरूर पोलिसांच्या अतिशय चौकस आणि धाडसी कारवाईमुळे सुमारे ६० लाख ४८ हजार रुपयांच्या गोवा बनावटीच्या दारूचा मोठा साठा उघडकीस आला आहे. अवैध दारू वाहतूक करणारा टेम्पो पकडून पोलिसांनी एकाच झटक्यात ५० हजारांहून अधिक बाटल्या जप्त केल्या. या कारवाईमुळे पुणे-नगर महामार्गावर सुरु असलेल्या दारूच्या गुप्त व्यवहारांचे जाळे उघडकीस येण्याची शक्यता आहे.
मुख्य मुद्दे : ६० लाख ४८ हजार रुपयांची गोवा बनावटीची दारू जप्त १५ लाख रुपयांचा टेम्पो देखील जप्त ,मुंबईतील चालक अटकेत, मोठ्या रॅकेटचा संशय ,पोलिसांच्या चौकस नजरेमुळे कारवाई कशी झाली कारवाई?
सोमवारी (दि. १०) रात्री शिरूर पोलीस ठाण्याच्या वाहतूक विभागातील शेखर झाडबुके आणि अप्पासाहेब कदम हे रात्री गस्त घालत असताना सरदवाडी परिसरात भरधाव वेगाने जाणाऱ्या टेम्पोने त्यांचे लक्ष वेधले. टेम्पोतील काहीतरी गडबड असल्याचा संशय आल्याने त्यांनी टेम्पो थांबवला. प्रथम टेम्पोचालकाने भंगार माल असल्याची बनावट बिल्टी दाखवून दिशाभूल करण्याचा प्रयत्न केला. मात्र, अप्पासाहेब कदम यांनी टेम्पोच्या मागील भागाची पाहणी केली असता फाटकी चादरं आणि भंगाराच्या ढिगाऱ्याखाली लपवलेल्या गोवा बनावटीच्या ‘रॉयल ब्लू’ दारूच्या बॉक्सचा साठा आढळला. अवैध दारूचा साठा आणि टेम्पो जप्त
या टेम्पोत एक हजार पन्नास बॉक्समधून तब्बल ५० हजार बाटल्या सापडल्या. पोलिसांनी टेम्पो (क्र. MH 48 CB 3605) ताब्यात घेतला. चालक मोहम्मद इम्रान मोहम्मद सलीम शेख (रा. घाटकोपर, मुंबई) याला अटक करण्यात आली आहे. मोठ्या रॅकेटचा संशय, तपास सुरू
ही दारू गोव्यातून नाशिककडे नेली जात होती, अशी माहिती पुढे आली आहे. यामागे मोठ्या प्रमाणावर रॅकेट कार्यरत असण्याची शक्यता पोलिसांनी व्यक्त केली आहे. एवढ्या मोठ्या प्रमाणावर दारू वाहतूक होत असताना केवळ एक व्यक्ती जबाबदार असू शकत नाही, असा पोलिसांचा अंदाज आहे. याबाबत पोलिस निरीक्षक संदेश केंजळे, उपनिरीक्षक शुभम चव्हाण, वाहतूक पोलिस भाग्यश्री जाधव व नीरज पिसाळ यांनी घटनास्थळी धाव घेऊन पुढील कारवाई हाती घेतली. पोलिस कोठडी व तपासाचा वेग वाढला
अटक करण्यात आलेल्या चालकास शनिवारी (दि. १५) पर्यंत पोलिस कोठडी सुनावण्यात आली आहे. या प्रकरणात दारूचा साठा नक्की कुठे नेला जाणार होता? कोणत्या टोळ्या यामागे आहेत? याचा तपास युद्धपातळीवर सुरु आहे.‘गोवा कनेक्शन’चा मागोवा
या कारवाईमुळे गोवा ते नाशिक असा मोठा दारू वाहतुकीचा मार्ग सक्रिय असल्याचे स्पष्ट झाले आहे. यातील मुख्य सूत्रधार कोण? पोलिसांपर्यंत पोहोचण्यापूर्वी कोणत्या गुप्त मार्गांचा वापर होतो? याचा तपास सुरू आहे.ही कामगिरी ठरली महत्त्वाची शिरूर पोलिस ठाण्याचे निरीक्षक संदेश केंजळे म्हणाले, “ही कारवाई केवळ दारू जप्त करण्यापुरती मर्यादित नाही, तर यामागील संपूर्ण रॅकेट शोधण्याचा आमचा कटाक्ष आहे. आरोपीच्या चौकशीतून अनेक धागेदोरे मिळण्याची शक्यता आहे.” हीरो ठरले गस्त करणारे पोलिस
या संपूर्ण प्रकरणात वाहतूक विभागातील अप्पासाहेब कदम व शेखर झाडबुके यांचे कौतुक होत आहे. त्यांच्या चौकस नजर व धाडसामुळे शहरात येणाऱ्या अवैध दारूचा मोठा साठा हाणून पाडण्यात यश आले. महत्त्वाचे ठळक मुद्दे : ६० लाख ४८ हजारांचा अवैध दारूसाठा पकडला. १५ लाखांचा टेम्पो जप्त. गोवा-नाशिक दरम्यान अवैध दारू वाहतुकीचं रॅकेट उघड. वाहतूक पोलिसांची बहादुरी. सखोल तपास आणि रॅकेटच्या मुळापर्यंत पोहोचण्याचा पोलिसांचा निर्धार.