चंदगड/ आजरा- प्रतिनिधी,
कोल्हापूर जिल्हा आणि कोकणाला जोडणाऱ्या अत्यंत महत्त्वाच्या ‘मोर्ले-पारगड’ रस्त्याचे काम गेल्या अनेक वर्षांपासून रखडले आहे. वनविभागाच्या जमिनीच्या बदल्यात पर्यायी जमीन देऊनही प्रशासनाकडून कामात टाळाटाळ होत असल्याचा आरोप करत, स्थानिक नागरिकांनी आता आक्रमक पवित्रा घेतला आहे. येत्या २४ फेब्रुवारी २०२६ पर्यंत प्रत्यक्ष कामाला सुरुवात न झाल्यास २५ फेब्रुवारीपासून दोडामार्ग येथील सार्वजनिक बांधकाम कार्यालयासमोर बेमुदत उपोषण करण्याचा इशारा नागरिकांनी दिला आहे.
काय आहे नेमके प्रकरण?
मोर्ले-पारगड रस्त्यासाठी वनविभागाची जमीन आवश्यक होती. त्यासाठी शाहूवाडी तालुक्यातील गजापूर येथील जमीन वनविभागाला हस्तांतरित करण्यात आली आहे. सर्व प्रक्रिया पूर्ण होऊनही ७ ते ८ कोटी रुपयांच्या निधीअभावी हे काम बंद पडल्याचे प्रशासनाकडून सांगण्यात येत आहे. मात्र, आंदोलकांनी या दाव्याला आव्हान दिले असून त्याबाबतचे पुरावे आपल्याकडे असल्याचे म्हटले आहे.
राज्य मार्ग १५७ अंतर्गत येणाऱ्या मोर्ले-घोटगेवाडी-पारगड-मिरवेल-इसापूर-हेरे या मार्गाचे काम अर्धवट अवस्थेत असल्याने प्रवाशांचे हाल होत आहेत. यापूर्वी २०१७ मध्ये हे काम सुरू झाले होते. १८ महिन्यांची मुदत असतानाही केवळ काही महिने काम होऊन ते बंद पडले.
प्रशासनाला दोन महिन्यांचा अल्टिमेटम
नागरिकांनी आमदार दीपक केसरकर आणि आमदार शिवाजी पाटील यांना निवेदन दिले आहे. आंदोलकांनी मागणी केली आहे की, दोन महिन्यांत रस्त्याचे काम पूर्ण करावे. जर २४ फेब्रुवारीपर्यंत काम सुरू झाले नाही, तर होणाऱ्या कायदा व सुव्यवस्थेच्या प्रश्नास प्रशासन जबाबदार राहील, असा स्पष्ट इशारा यावेळी देण्यात आला आहे.
मुख्य मागणी: रखडलेल्या मोर्ले-पारगड रस्त्याचे काम तात्काळ सुरू करून २ महिन्यांत पूर्ण करावे.
आंदोलनाचा इशारा: २४ फेब्रुवारी २०२६ पर्यंत काम सुरू न झाल्यास, २५ फेब्रुवारीपासून बेमुदत उपोषण.
निधीचा प्रश्न: ७ ते ८ कोटी रुपयांच्या निधीअभावी काम रखडल्याचे प्रशासनाचे म्हणणे.
जमीन हस्तांतरण: वनविभागाला गजापूर (ता. शाहूवाडी) येथील जमीन देऊनही तांत्रिक अडथळे कायम.
इतिहास: २०१७ मध्ये कामाला सुरुवात झाली होती, मात्र १८ महिन्यांची मुदत उलटूनही काम अपूर्णच.
आंदोलनाचे ठिकाण: दोडामार्ग (जि. सिंधुदुर्ग) येथील सार्वजनिक बांधकाम विभाग कार्यालय.
लोकप्रतिनिधींना साकडे: आमदार दीपक केसरकर आणि आमदार शिवाजी पाटील यांना निवेदन सादर.
