ग्रंथतुला, समई प्रदान व हरिपाठ वाटपातून सामाजिक बांधिलकीचा आदर्श
आजरा : तालुक्यातील बहिरेवाडी येथे हभप श्री. आप्पा लक्ष्मण मोरे (वय ९१) व सौ. हौशाबाई आप्पा मोरे यांच्या सहजीवनाचा अमृतमहोत्सवी सोहळा अत्यंत भक्तिमय वातावरणात संपन्न झाला. सहजीवनाच्या ७५ वर्षांच्या प्रवासानिमित्त आयोजित या सोहळ्यात ग्रंथतुला, समई प्रदान व सार्थ हरिपाठाचे वाटप करण्यात आले.
ग्रंथतुलामधून संकलित झालेली पुस्तके बहिरेवाडीतील प्राथमिक विद्यामंदिर, भैरवनाथ हायस्कूल तसेच श्रीमंत गंगामाई वाचन मंदिर आजरा यांना समारंभपूर्वक सुपूर्द करण्यात आली.
श्री रुक्मिणी विठ्ठल मंदिरासाठी पंढरपूर येथील एकनाथ नामदास महाराज यांच्या हस्ते मोरे कुटुंबियांच्या वतीने दोन समई प्रदान करण्यात आल्या. यावेळी बोलताना महाराजांनी, “वयाची ९१ वर्षे आणि सहजीवनाचा अमृतमहोत्सव हा दुर्मिळ योग असून मोरे कुटुंबीयांनी सामाजिक बांधिलकी जपत समाजासमोर प्रेरणादायी आदर्श निर्माण केला आहे,” असे गौरवोद्गार काढले.
मोरे दाम्पत्यांचा अमृतमहोत्सव व हभप आप्पा मोरे यांचा ९१ वा वाढदिवस असा संयुक्त सोहळा श्री रुक्मिणी विठ्ठल मंदिर, बहिरेवाडी येथे झाला. या प्रसंगी पाद्यपूजन, ९१ आरतीची ओवाळणी, मंदिरासाठी समई भेट, हरिपाठ वाटप व महाप्रसादाचे आयोजन करण्यात आले.
यावेळी हभप आप्पा मोरे व सौ. हौशाबाई मोरे यांचा साडी-चोळी व वस्त्र देऊन सत्कार करण्यात आला. कार्यक्रमास श्री रुक्मिणी विठ्ठल मंदिर समितीचे पदाधिकारी, वारकरी बांधव व मोरे कुटुंबीय मोठ्या संख्येने उपस्थित होते.
मोरे कुटुंबियांनी साजरा केलेला हा अमृतमहोत्सवी सोहळा वारकरी संप्रदायासाठी प्रेरणादायी ठरला असून परिसरात या उपक्रमाचे सर्वत्र कौतुक होत आहे.
