सिंदखेड राजा मतदारसंघात विशेष नोंदणी कॅम्प; उपविभागीय अधिकाऱ्यांकडून मतदान केंद्रांची पाहणी
सिंदखेड राजा प्रतिनिधी
सिंदखेड राजा — विधानसभा मतदारसंघातील मतदार यादी अधिक अचूक व अद्ययावत करण्यासाठी प्रशासनाकडून विशेष मतदार नोंदणी कॅम्पचे आयोजन करण्यात आले आहे. भारत निवडणूक आयोगाच्या निर्देशानुसार दि. ३ व ४ ऑक्टोबर २०२६ रोजी मतदारसंघातील सर्व मतदान केंद्रांवर हा विशेष कॅम्प राबविण्यात येत आहे.
या विशेष कॅम्पच्या कामकाजाची पाहणी उपविभागीय अधिकारी तथा मतदार नोंदणी अधिकारी प्रा. संजय खडसे यांनी विविध मतदान केंद्रांना प्रत्यक्ष भेट देऊन केली. यावेळी त्यांनी मतदान केंद्रस्तरीय अधिकारी (BLO) यांच्याकडून मतदार नोंदणी व मतदार यादी अद्ययावतीकरणाच्या कामाचा आढावा घेतला.
कॅम्पमध्ये नवीन मतदारांची नोंदणी, मतदारांच्या नावातील दुरुस्ती, पत्ता बदल तसेच मृत व स्थलांतरित मतदारांची नावे वगळणे यासंबंधी प्राप्त अर्जांवर कार्यवाही करण्यात येत आहे. प्राप्त अर्जांची वेळेत छाननी करून नियमानुसार कार्यवाही करण्याच्या सूचना संबंधित अधिकाऱ्यांना देण्यात आल्या.
नवमतदारांनी नोंदणीची संधी साधावी
लोकशाही प्रक्रियेत मतदार यादीचे महत्त्व लक्षात घेता पात्र नागरिकांनी मतदार यादीत आपले नाव आहे किंवा नाही, याची खात्री करून घ्यावी. विशेषतः १८ वर्षे पूर्ण केलेल्या नवमतदारांनी पुढाकार घेऊन मतदार म्हणून नोंदणी करावी, असे आवाहन प्रशासनाकडून करण्यात आले आहे.
गावातील मतदान केंद्रावरच नोंदणी आणि मतदार यादीतील आवश्यक दुरुस्तीची सुविधा उपलब्ध करून देण्यात आल्याने नागरिकांना शासकीय कार्यालयात जाण्याचा अतिरिक्त त्रास टाळता येणार आहे. त्यामुळे पात्र नागरिकांनी या विशेष कॅम्पचा लाभ घेऊन मतदार यादी अद्ययावत करण्याचे आवाहन करण्यात आले आहे.
अधिकारी-कर्मचाऱ्यांची उपस्थिती
या पाहणीदरम्यान उपविभागीय अधिकारी तथा मतदार नोंदणी अधिकारी प्रा. संजय खडसे, तहसीलदार तथा सहाय्यक मतदार नोंदणी अधिकारी अजित दिवटे, नायब तहसीलदार प्रवीणकुमार वराडे, नायब तहसीलदार संदीप बंगाळे, तसेच नागेश खरात, गणेश देशमुख, रामेश्वर हिरे, बीएलओ आणि स्थानिक नागरिक उपस्थित होते.
