समित्यांविना कारभार आणि विकासकामांच्या प्रक्रियेबाबत ग्रामस्थांचे सवाल; सीईओंकडे तक्रार करण्याची तयारी
धर्मपुरी, ता. माळशिरस, जि. सोलापूर : धर्मपुरी ग्रामपंचायतीची निवडणूक होऊन तीन वर्षे उलटूनही विविध समित्यांची स्थापना झाली नसल्याचा आरोप ग्रामपंचायत सदस्य व ग्रामस्थांकडून करण्यात येत आहे. त्यामुळे ग्रामपंचायतीच्या कारभाराबाबत प्रश्न उपस्थित झाले आहेत.
ग्रामविकास, पाणीपुरवठा, स्वच्छता, महिला व बालकल्याण तसेच विविध योजनांच्या अंमलबजावणीसाठी लागू असलेल्या समित्यांची स्थापना, त्यांचे ठराव आणि कामकाज याबाबत ग्रामपंचायतीच्या अभिलेखात स्पष्ट नोंद आहे का, याची चौकशी करण्याची मागणी होत आहे.
मागील तीन वर्षांत ग्रामपंचायतीमार्फत रस्ते, पाणीपुरवठा, स्वच्छता, दिवाबत्ती आणि इतर विकासकामे करण्यात आली. मात्र संबंधित समित्यांची स्थापना झाली नसेल, तर या कामांची निर्णयप्रक्रिया कोणत्या ठराव व मंजुरीच्या आधारे झाली, असा सवाल ग्रामस्थांकडून उपस्थित करण्यात येत आहे. संबंधित कामांचे ठराव, प्रशासकीय व तांत्रिक मंजुरी, कार्यादेश, मोजमाप पुस्तिका आणि देयकांची प्रक्रिया नियमांनुसार झाली का, याचीही तपासणी करण्याची मागणी करण्यात आली आहे.
ग्रामपंचायत सदस्य भारत तुकाराम डबडे यांनी यापूर्वीही ग्रामपंचायतीच्या कारभाराबाबत तक्रारी केल्याचे सांगण्यात येत असून, आता या प्रकरणी मुख्य कार्यकारी अधिकारी, जिल्हा परिषद सोलापूर यांच्याकडे लेखी तक्रार करण्याची तयारी असल्याचे समजते.
दरम्यान, समित्या स्थापन न झाल्याचा आरोप आणि विकासकामांच्या प्रक्रियेबाबत उपस्थित करण्यात आलेल्या प्रश्नांची अधिकृत पडताळणी होणे आवश्यक असून, प्रशासनाच्या चौकशीत नेमकी वस्तुस्थिती काय समोर येते, याकडे धर्मपुरी ग्रामस्थांचे लक्ष लागले आहे.
