🔴 अखिल भारतीय मराठा संघ–मराठा महासंघ, आजरा तर्फे 🔶 श्री छत्रपती शिवाजी महाराज जयंती उत्सव उत्साहात साजरा 🔶

अखिल भारतीय मराठा संघ – मराठा महासंघ, तालुका आजरा यांच्या वतीने 19 फेब्रुवारी 2026 रोजी श्री छत्रपती शिवाजी महाराज जयंती उत्सव उत्साहात साजरा करण्यात आला. कार्यक्रमाचे स्वागत व प्रास्ताविक संभाजी इंजल (कार्याध्यक्ष, मराठा महासंघ) यांनी केले.
सकाळी छत्रपती शिवाजी महाराज यांच्या पुतळ्याचे पूजन तालुका अध्यक्ष बंडा चव्हाण व जिल्हाध्यक्ष मारुतीराव मोरे यांच्या मार्गदर्शनाखाली उपनगराध्यक्ष सौ. पूजा अश्विन डोंगरे यांच्या शुभहस्ते पार पडले. यावेळी नगरसेविका अश्विनी चव्हाण, अनिकेत चराटी, असिफ सोनेखान, डॉ. स्मिता कुंभार तसेच मंडळाचे सदस्य उपस्थित होते. कार्यक्रमात शरण्य कुंभार, सिद्धी नाईक व स्वराली ओतारी या मुलींनी शिवगर्जना व ध्येयमंत्र सादर करून वातावरण भारावून टाकले.
यानंतर डॉ. भोसले मॅडम यांनी छत्रपती शिवाजी महाराजांच्या जीवनातील प्रसंगांचा संदर्भ देत प्रेरणादायी मनोगत व्यक्त केले. त्या म्हणाल्या की, छत्रपती स्त्रियांच्या बाबतीत अत्यंत दक्ष होते. कोणत्याही स्त्रीवर अन्याय झाल्यास रांझ्याच्या पाटलासारखी कठोर शिक्षा देणारे ते न्यायप्रिय राजे होते. तसेच बहुजन समाजाला एकत्र करून अन्यायी मुघल सत्तेविरुद्ध उभे राहत त्यांनी स्वातंत्र्य मिळवून दिले.
यानंतर आजरा हायस्कूल इयत्ता पाचवीची विद्यार्थिनी रिया संतोष पारपोलकर हिने हिरकणीने आपली सुटका कशी करून घेतली यावर आधारित लघुनाट्य सादर केले. तसेच व्यंकटराव हायस्कूल, आजरा येथील इयत्ता पाचवीची स्वराली सागर सावंत हिने पन्हाळगडाच्या वेढ्यातून छत्रपतींच्या सुटकेसाठी शिवा काशिद यांनी दिलेले बलिदान प्रभावीपणे सादर केले. या दोघींना तालुका महिला अध्यक्ष सौ. मीनल एंजल व जिल्हा महिला उपाध्यक्ष भैरवी सावंत यांच्या शुभहस्ते ₹250 रोख व शील्ड देऊन गौरविण्यात आले.
विशेष आकर्षण ठरलेल्या महिला लेझीम सादरीकरणात मुरुडे संघ व मसोली संघ यांनी सहभाग घेतला. त्यांना उपनगराध्यक्ष सौ. पूजा डोंगरे, माजी नगराध्यक्ष ज्योत्स्ना चराटी व इतर महिला पदाधिकाऱ्यांच्या हस्ते ₹5000 रोख व शील्ड प्रदान करण्यात आले. सदर कार्यक्रमासाठी मोरे ॲग्रो इंडस्ट्रीज यांच्याकडून शील्ड देण्यात आले.
या कार्यक्रमासाठी उपाध्यक्ष शंकरराव शिंदे, शिवाजीराव पाटील, सरचिटणीस प्रकाशराव देसाई, विष्णू सुपर, दत्ता मोहिते, शि. डी. सरदेसाई, गणपतराव डोंगरे, शिवाजीराव इंजल, चंद्रकांत पारपोलकर, सी. आर. देसाई, राजेंद्र सावंत, धनश्री देसाई, महादेवराव पवार, भाऊसो निर्मळे, आनंदा गावडे, राजू होलम यांच्यासह गोडसे मॅडम, शिंदे मॅडम, मोरे वहिनी, गीता नाईक आदी मान्यवर उपस्थित होते. कार्यक्रमाचे आभार सी. आर. देसाई सर यांनी मानले.