प्रशासकीय अधिकारी, विद्यार्थी आणि शिवप्रेमींच्या सहभागाने सांगली ‘शिवमय’; युद्धकलांच्या प्रात्यक्षिकांनी वेधले लक्ष
अखंड महाराष्ट्राचे आराध्य दैवत छत्रपती शिवाजी महाराज यांच्या जयंतीनिमित्त आज सांगलीत जिल्हा प्रशासन आणि महानगरपालिका यांच्या वतीने अभूतपूर्व ‘मेगा पदयात्रा’ काढण्यात आली. “जय भवानी, जय शिवाजी” च्या जयघोषात आणि पारंपरिक वाद्यांच्या गजरात निघालेल्या या पदयात्रेने संपूर्ण सांगली नगरी शिवमय झाली होती. जिल्हा परिषद ते मारुती चौक या मार्गावर हजारो शिवप्रेमींनी चालत सहभाग नोंदवून शिवरायांप्रती आपली निष्ठा व्यक्त केली. जिल्हा परिषद येथील छत्रपती शिवाजी महाराजांच्या पुतळ्यास जिल्हाधिकारी श्री. अशोक काकडे यांच्या हस्ते पुष्पहार अर्पण करून पदयात्रेचा उत्साहात प्रारंभ झाला. यावेळी महानगरपालिका आयुक्त सत्यम गांधी, जिल्हा परिषद मुख्य कार्यकारी अधिकारी विशाल नरवाडे, पोलीस अधीक्षक संदीप घुगे यांच्यासह प्रशासनातील वरिष्ठ अधिकारी उपस्थित होते. विशेष म्हणजे, सर्वच वरिष्ठ अधिकाऱ्यांनी पदयात्रेत प्रत्यक्ष चालत सहभाग नोंदवून या सोहळ्याची रंगत वाढवली.पदयात्रेदरम्यान विद्यार्थ्यांनी सादर केलेली शिवकालीन युद्धकलांची प्रात्यक्षिके आकर्षणाचे केंद्र ठरली.तलवारबाजी व लाठी-काठी: चपळाईने केलेल्या या खेळांनी उपस्थितांच्या डोळ्यांचे पारणे फेडले. पारंपरिक लेझीमच्या तालावर आणि मल्लखांबावरील कसरतींनी शिवकालीन पराक्रमाची आठवण करून दिली.शाहिरांच्या पोवाड्यांनी वातावरणात वीररस भरला होता.पदयात्रेत अनेक चिमुकल्यांनी ‘बाल शिवबा’ आणि ‘राजमाता जिजाऊ’ यांची वेशभूषा साकारली होती. पारंपरिक फेटे आणि वेशभूषेतील नागरिक व विद्यार्थ्यांमुळे पदयात्रेला एक वेगळेच ऐतिहासिक स्वरूप प्राप्त झाले होते.जिल्हा परिषद येथून निघालेली ही पदयात्रा राम मंदिर चौक, स्टेशन चौक आणि राजवाडा चौक मार्गे मार्गक्रमण करत मारुती चौक येथे पोहोचली. या ठिकाणी असलेल्या शिवरायांच्या अश्वारूढ पुतळ्यास सर्व मान्यवरांनी पुष्पहार अर्पण करून वंदन केले आणि या भव्य सोहळ्याची सांगता झाली.या सोहळ्याला अपर जिल्हाधिकारी सुशांत खांडेकर, अतिरिक्त मुख्य कार्यकारी अधिकारी मनोज जाधव, अतिरिक्त आयुक्त राहुल रोकडे, उपायुक्त अश्विनी पाटील, निवासी उपजिल्हाधिकारी डॉ. स्नेहल कनिचे, प्रकल्प संचालक नंदिनी घाणेकर यांच्यासह जिल्हा प्रशासन व महानगरपालिकेचे सर्व विभाग प्रमुख, अधिकारी, कर्मचारी आणि नागरिक मोठ्या संख्येने उपस्थित होते.
