कल्याण (पूर्व) – येथील विघ्नहर्ता रेसिडेन्सीमध्ये छत्रपती शिवाजी महाराज यांच्या जयंतीनिमित्त शिवजयंती उत्सव मोठ्या उत्साहात आणि भक्तीभावात साजरा करण्यात आला.
सकाळी दुर्गाडी किल्ला येथून शिवज्योत आणण्यात आली. त्यानंतर नवनिर्वाचित नगरसेविका सौ. स्नेहा आशिष भाने यांच्या निवासस्थानावरून महाराजांच्या पालखीची भव्य मिरवणूक काढण्यात आली.
मिरवणुकीत लहान मुले व महिलांनी उत्स्फूर्त सहभाग घेत लेझीम सादर केली. “जय भवानी, जय शिवाजी”च्या घोषणांनी संपूर्ण परिसर दुमदुमून गेला.
यानंतर महाराजांच्या मूर्तीची विधीवत पूजा व आरती करण्यात आली. दुपारच्या सत्रात लहान मुलांसाठी विविध स्पर्धांचे आयोजन करण्यात आले, तर संध्याकाळी आकर्षक नृत्य स्पर्धा पार पडल्या.
कार्यक्रमाला स्थानिक प्रतिनिधी व उद्योगपती उपस्थित राहून आयोजकांचे कौतुक केले. स्पर्धांतील विजेत्यांना मान्यवरांच्या हस्ते पारितोषिके प्रदान करण्यात आली.
संपूर्ण कार्यक्रम उत्साहपूर्ण व शिस्तबद्ध वातावरणात यशस्वीरित्या पार पडला.
