नवी मुंबईतील कोपरखैराणे सेक्टर ७ या भागात यंदाची शिवजयंती महिलांच्या पुढाकारातून मोठ्या उत्साहात आणि भक्तिभावाने साजरी करण्यात आली. विशेष म्हणजे संपूर्ण कार्यक्रमाचे नियोजन व आयोजन महिलांनीच हाती घेतले होते.
कार्यक्रमाची सुरुवात शिवज्योत आणून करण्यात आली. त्यानंतर भगव्या झेंड्यांच्या साक्षीने मिरवणूक काढण्यात आली. ढोल-ताशांच्या गजरात परिसर दुमदुमून गेला होता. महिलांनी पारंपरिक वेशभूषेत सहभागी होत छत्रपती शिवाजी महाराजांच्या प्रतिमेस पुष्पहार अर्पण करून आरती केली.
यावेळी शिवचरित्रावर आधारित भाषणे, पोवाडे व सांस्कृतिक कार्यक्रम सादर करण्यात आले. उपस्थित महिलांनी शिवरायांच्या स्त्री सन्मानाच्या विचारांना उजाळा देत समाजात एकात्मता व महिला सक्षमीकरणाचा संदेश दिला.
या अनोख्या उपक्रमामुळे परिसरात प्रेरणादायी वातावरण निर्माण झाले असून, महिलांच्या एकजुटीचे हे उत्तम उदाहरण असल्याची भावना उपस्थितांनी व्यक्त केली. कार्यक्रमाच्या यशस्वी आयोजनाबद्दल आयोजक महिलांचे सर्वत्र कौतुक होत आहे.
गेली ११ वर्ष सातत्याने माऊली ग्रुप या नावाने या महिला एकत्र येऊन या शैक्षणिक सामाजिक कार्यक्रम राबवत आहेत.
