लातूर प्रतिनिधी –
याबाबत अधिक माहिती अशी की, पोलीस स्टेशन शिवाजीनगर, लातूर येथे गु.र.नं. ५३/२०२६ कलम ३०३ (२) भा.न्या.सं. अन्वये दाखल असलेल्या चोरीच्या गुन्ह्याचा स्थानिक गुन्हे शाखेने (LCB) अत्यंत कौशल्यपूर्ण तपास करून चोरीच्या गुन्ह्याचा छडा लावला असून ५,५०,०००/- रुपयांचा मुद्देमाल हस्तगत करण्यात आला आहे.
याबाबत अधिक माहिती अशी की, पोलीस ठाणे शिवाजीनगर येथे दाखल नमूद गुन्ह्याचा उलगडा करून आरोपींना अटक करण्यासंदर्भात पोलीस अधीक्षक श्री. अमोल तांबे यांनी स्थानिक गुन्हे शाखेला निर्देशित केले होते. त्या अनुषंगाने अपर पोलीस अधीक्षक मंगेश चव्हाण यांचे मार्गदर्शनात स्थानिक गुन्हे शाखेचे पोलीस निरीक्षक सुधाकर बावकर यांच्या नेतृत्वातील पथकाने लातूर जिल्ह्यात मालमत्तेविषयक गुन्हे करणाऱ्या गुन्हेगारांची माहिती संकलित करून सदरचा गुन्हा उघडकीस आणण्यासाठी गुन्ह्यातील संशयितांचा शोध घेत होते.
दरम्यान दि. ०८/०२/२०२६ रोजी सायंकाळी पथकाने पो.स्टे. शिवाजीनगर, लातूर येथे दाखल गुन्ह्यातील संशयित आरोपी नामे १) जावेद जलील शेख (वय २७ वर्षे, रा. बिलाल मजीद जवळ, इस्लामपुरा, लातूर) यास खोरी गल्ली परिसरातून त्यास ताब्यात घेतले व पुढील तपासासाठी विश्वासात घेऊन सखोल चौकशी केली असता आरोपीने गुन्ह्याची कबुली दिली. तो गेल्या अकरा वर्षांपासून टिळक नगर, लातूर येथील एका डायग्नोस्टिक सेंटर मध्ये एक्स-रे तंत्रज्ञ म्हणून कार्यरत आहे. सदर ठिकाणी ग्राहकांकडून जमा झालेली रक्कम बँकेत जमा करण्यात येत होती. ही रक्कम काही वेळा आरोपी जावेद शेख व त्याचा सहकारी अर्शद शेख यांच्या ताब्यात दिली जात असे. ही बाब जावेद शेख ने त्याचा मित्र आकाश ढगे यास सांगितली. दोघांनी संगनमताने अर्शद शेख यांच्या अक्सेस स्कूटरची बनावट चावी तयार करून स्कूटरच्या डिक्कीत ठेवलेली रक्कम चोरी करण्याचा कट रचला.
सुमारे महिनाभरापूर्वी बनावट चावी तयार करून ती जावेद शेख ने आकाश ढगे याच्याकडे दिली.
दि. ०५/०२/२०२६ रोजी संबंधित डायग्नोस्टिक सेंटर ने जावेद शेख कडे ९०,०००/- रुपये व अर्शद शेख याच्याकडे ६,००,०००/- रुपये बँकेत भरण्यासाठी देण्यात आले होते. दोघांनीही संबंधित रक्कम आपल्या-आपल्या स्कूटरच्या डिक्कीत ठेवली. त्यानंतर एका चहाच्या स्टॉलसमोर गाड्या उभ्या करून चहा पिण्यासाठी थांबले असता जावेद शेखने आकाश ढगे फोनवर माहिती दिली. काही वेळाने अर्शद शेख यांची स्कूटर तेथून गायब झाली. नंतर ती स्कूटर हायटेक सेंटर समोरील बोळात आढळून आली; मात्र डिक्कीतील ६,००,०००/- रुपये रोख रक्कम गायब असल्याचे निदर्शनास आले. या प्रकरणी दि. ०८/०२/२०२६ रोजी पोलीस स्टेशन शिवाजीनगर येथे तक्रार दाखल करण्यात आली होती.
तपासादरम्यान आरोपी जावेद जलील शेख व त्याचा साथीदार आकाश ढगे यांनी संगनमताने बनावट चावी तयार करून चोरीचा बनाव रचून सदर ६,००,०००/- रुपये अपहार केल्याचे निष्पन्न झाले. निष्पन्न आरोपी जावेद जलील शेख यास पुढील तपास कमी पोलीस स्टेशन शिवाजीनगर येथे हजर करण्यात आले होते परंतु चोरीची रक्कम फरार आरोपी आकाश ढगे यांच्या ताब्यात असल्याने स्थानिक गुन्हे शाखेच्या पथकाने शोध मोहीम राबवून मिळालेल्या गोपनीय माहितीनुसार मौजे जोडजवळा, ता. जि. लातूर येथे सापळा रचून आरोपी आकाश प्रकाश ढगे (वय ३० वर्षे, रा. जोडजवळा, ता. जि. लातूर, सध्या रा. लेबर कॉलनी, लातूर) यास ताब्यात घेतले. सखोल चौकशीत आरोपीने त्याचा साथीदार जावेद जलील शेख (वय २७ वर्षे, रा. बिलाल मशीद जवळ, इस्लामपुरा, लातूर) याच्यासह मिळून चोरी केल्याची कबुली दिली. चोरीतील ६ लाख रुपयांपैकी ५० हजार रुपये खर्च केल्याचे सांगितले असून उर्वरित ५,५०,०००/- रुपये आरोपीने जोडजवळा येथील भावाच्या घरात लपवून ठेवल्याचे निष्पन्न झाले. यावरून ५,५०,०००/- रुपये रोख रक्कम जप्त करण्यात आली आहे.
आरोपी नामे
१) जावेद शेख यास दिनांक ०८/०२/२०२६ रोजी खोरी गल्ली येथून तर २) आकाश ढगे याला दिनांक १७/०२/२०२६ रोजी जोडजवळा येथून स्थानिक गुन्हे शाखेकडून ताब्यात घेण्यात आले आहे. असून पुढील तपास पोलीस स्टेशन शिवाजीनगर, लातूर येथे सुरू आहे.
सदर कारवाई पोलीस अधीक्षक श्री. अमोल तांबे, अपर पोलीस अधीक्षक श्री. मंगेश चव्हाण यांच्या मार्गदर्शनाखाली स्थानिक गुन्हे शाखेचे पोलीस निरीक्षक सुधाकर बावकर यांच्या नेतृत्वातील पथकामधील सहाय्यक पोलीस निरीक्षक सदानंद भुजबळ, पोलीस उपनिरीक्षक अमर केंद्रे, राजेश घाडगे, सफौ सर्जेराव जगताप, पोलीस अंमलदार युवराज गिरी, राजेश कंचे, मोहन सुरवसे, अर्जुन राजपूत, प्रदीप स्वामी, जमीर शेख, सुरेखा मदने, श्रीनिवास जांभळे , राहुल कांबळे यांनी केली आहे.
