रामटेक तालुक्यांतर्गत येणाऱ्या देवलापार परिसर पुन्हा एकदा वाघाच्या हल्ल्यामुळे हादरला आहे. सावरा गावाजवळ शेतात काम करत असलेल्या ३५ वर्षीय महिलेचा वाघाच्या हल्ल्यात मृत्यू झाल्याची घटना दुपारी सुमारास घडली.मुक्ता जोगड्या मरसकोल्हे (वय ३५) या दुपारी अंदाजे १ वाजता शेतात काम करत असताना अचानक वाघाने त्यांच्यावर झडप घातल्याची माहिती समोर आली आहे. हल्ला इतका भीषण होता की त्यांचा घटनास्थळीच मृत्यू झाला. घटनेनंतर गावकऱ्यांनी मोठ्या संख्येने शेताकडे धाव घेतली.
देवलापार आणि आसपासच्या भागात मागील काही दिवसांपासून वाघाच्या हालचाली वाढल्या असल्याची चर्चा आहे. त्यामुळे शेतकरी आणि नागरिकांमध्ये आधीच भीतीचे वातावरण होते. या ताज्या घटनेनंतर परिसरात दहशतीचे सावट आणखी गडद झाले आहे.
माहिती मिळताच वन विभागाचे अधिकारी व कर्मचारी तसेच पोलिस घटनास्थळी दाखल झाले. मृतदेह पंचनामा करून पुढील प्रक्रिया सुरू करण्यात आली आहे. संबंधित वाघाचा शोध घेण्यासाठी पथक तयार करण्यात येत असल्याची माहिती सूत्रांनी दिली.दरम्यान, नागरिकांनी तातडीने ठोस उपाययोजना करण्याची मागणी केली असून, शेतकऱ्यांच्या सुरक्षेसाठी कायमस्वरूपी उपाययोजना कराव्यात, अशी मागणी जोर धरत आहे. वन विभागाकडून अधिकृत निवेदनानंतर पुढील तपशील स्पष्ट होणार आहे.
