वेंगसर पंचशील नगरीतील समाज मंदिर येथे वेंगसर बौद्ध विकास मंडळ मुंबई (रजि.) ग्रामीण, माता रमाई महिला मंडळ वेंगसर तसेच सम्यक युवा कला मंच यांच्या संयुक्त विद्यमाने नवनिर्वाचित कोळपे जिल्हा परिषद सदस्य प्रमोदजी रावराणे व तिथवली पंचायत समिती सदस्या सौ. सुवर्णा संसारे (मा. सभापती) यांचा भव्य सत्कार समारंभ उत्साहात पार पडला.
कार्यक्रमाची सुरुवात छत्रपती शिवाजी महाराज, गौतम बुद्ध तसेच डॉ. बाबासाहेब आंबेडकर यांच्या प्रतिमांना पुष्प अर्पण करून करण्यात आली. शिवजयंतीचे औचित्य साधून आयोजित या कार्यक्रमास ग्रामस्थांची उत्स्फूर्त उपस्थिती लाभली.
कोळपे जिल्हा परिषद मतदारसंघातून बिनविरोध निवडून आलेले प्रमोदजी रावराणे यांचा वेंगसर बौद्ध विकास मंडळाचे ज्येष्ठ सल्लागार गुणाजी पांडुरंग कांबळे व सुभाष कांबळे यांच्या हस्ते शाल व पुष्पगुच्छ देऊन सत्कार करण्यात आला. तसेच तिथवली पंचायत समिती सदस्या सौ. सुवर्णा संसारे यांचा माता रमाई महिला मंडळाच्या कार्यकर्त्यांच्या शुभहस्ते गौरव करण्यात आला.
सत्काराला उत्तर देताना प्रमोदजी रावराणे यांनी डॉ. बाबासाहेब आंबेडकर यांनी दिलेला “शिका, संघटित व्हा” हा संदेश अधोरेखित करत सर्व बौद्ध बांधवांनी मतभेद बाजूला ठेवून एकत्र येणे आवश्यक असल्याचे प्रतिपादन केले. संघटितपणातूनच सर्वांगीण विकास शक्य असून मतदारसंघ तंटामुक्त करण्याचे आपले स्वप्न असल्याचे त्यांनी स्पष्ट केले.
मुंबई (रजि.) मंडळ व ग्रामीण मंडळाच्या वतीने नवनिर्वाचित सदस्यांचे अभिनंदन करून त्यांच्या पुढील राजकीय वाटचालीस शुभेच्छा देण्यात आल्या.
या कार्यक्रमाला वैभववाडी तालुका माता रमाई महिला मंडळाच्या अध्यक्षा व माजी समाजकल्याण सभापती (सिंधुदुर्ग) सौ. शारदा कांबळे, सुभाष कांबळे (संविधान सैनिक संघ महाराष्ट्र राज्य अध्यक्ष), गोविंद कांबळे, सौ. साक्षी कांबळे (मा. सरपंच), समाधान गुरव (मा. उपसरपंच), विलास पावसकर (मा. ग्रा.पं. सदस्य), संदीप नार्वेकर (तंटामुक्त अध्यक्ष), आत्माराम गोठणकर, रमेश बंदरकर, सुभाष घाडी, आनंद शिंदे, महेंद्र रांबाडे, मनोहर फोंडके, महेश संसारे तसेच महिला मंडळाच्या कार्यकर्त्या सौ. सुनयना कोटकर, सौ. स्नेहलता जाधव, सौ. सुमन कोटकर, सौ. पुनम कांबळे, सौ. सुनिता कांबळे आदी मान्यवर उपस्थित होते.
कार्यक्रमाच्या यशस्वीतेसाठी रोहित जाधव, सार्थक जाधव, सक्षम पुरळकर, अक्षय जाधव, सुरज जाधव, संदेश कांबळे, कु. ऋतूजा कांबळे, कु. सान्वी कांबळे या युवकांनी विशेष परिश्रम घेतले. कार्यक्रमाचे सूत्रसंचालन व आभार प्रदर्शन सुभाष कांबळे यांनी केले.
सामाजिक एकजूट आणि प्रेरणादायी संदेशांनी परिपूर्ण असा हा सत्कार सोहळा उत्साहात संपन्न झाला.
