पंढरपूर (प्रतिनिधी):
बाभुळगाव येथे एका २२ वर्षीय तरुणाचा पडीक विहिरीत मृतदेह आढळून आल्याने परिसरात खळबळ उडाली आहे. मृत तरुणाचे नाव सोमनाथ नामदेव माळी असे असून, घटनेची माहिती गावात समजताच नागरिकांनी घटनास्थळी मोठी गर्दी केली.
या प्रकरणी पंढरपूर ग्रामीण पोलीस स्टेशन चे पोलीस अधिकारी मुजावर साहेब यांनी घटनास्थळी भेट देऊन पाहणी केली. प्राथमिक तपासात मृत व्यक्तीच्या डोक्याच्या पाठीमागील भागावर मार लागल्याचे आढळून आले असून, अंगावरही जखमांच्या खुणा असल्याचे समोर आले आहे.
मृत्यूचे नेमके कारण अद्याप स्पष्ट झाले नसून, हा अपघात आहे की घातपात, याबाबत संशय व्यक्त केला जात आहे. पोलिसांनी पंचनामा करून मृतदेह शवविच्छेदनासाठी पाठविला असून, अहवालानंतर मृत्यूचे कारण स्पष्ट होणार आहे.
दरम्यान, या घटनेमुळे गावात भीतीचे वातावरण निर्माण झाले असून, पुढील तपास पोलीस प्रशासनाकडून सुरू आहे.
