बेकायदेशीर टर्फवर कारवाईची पत्रकार मित्र असोसिएशनची मागणी
पनवेल (प्रतिनिधी):
पनवेल महानगरपालिका हद्दीतील सार्वजनिक वापरासाठी राखीव असलेल्या मैदानांवर काही शाळा, महाविद्यालये व खाजगी संस्थांकडून बेकायदेशीररीत्या फुटबॉल व क्रिकेट टर्फ उभारून आर्थिक लूट सुरू असल्याचा गंभीर आरोप करण्यात आला आहे.
या संदर्भात पत्रकार मित्र असोसिएशन चे अध्यक्ष केवल महाडिक यांनी पनवेल महानगरपालिका तसेच सिडको प्रशासनाला पत्र देऊन तात्काळ कारवाईची मागणी केली आहे.
मिळालेल्या माहितीनुसार, संबंधित टर्फवर तासागणिक १५०० ते २५०० रुपये शुल्क आकारले जात असून, दिवसाला सुमारे १५,००० ते २५,००० रुपये आणि महिन्याला ५ ते ८ लाख रुपयांपर्यंत अवैध कमाई होत असल्याचा आरोप करण्यात आला आहे.
सार्वजनिक वापरासाठी राखीव असलेली मैदाने स्थानिक मुलं, युवक आणि खेळाडूंसाठी असताना, त्यावर फी आकारून प्रवेश दिला जात असल्याने गंभीर प्रश्न निर्माण झाला आहे. अनेक ठिकाणी शेड किंवा टर्फ उभारण्यासाठी आवश्यक परवानग्या घेतलेल्या नसल्याचेही सांगितले जात आहे. शासनाला महसूल न देता हा व्यवसाय सुरू असल्याचा आरोप संघटनेने केला आहे.
यामुळे गरीब व मध्यमवर्गीय कुटुंबातील खेळाडूंना खेळाच्या मूलभूत हक्कापासून वंचित राहावे लागत असल्याचे नमूद करण्यात आले आहे. सार्वजनिक मालमत्तेचे खाजगीकरण थांबवून स्थानिक खेळाडूंना मैदानांचा मुक्त व विनामूल्य वापर उपलब्ध करून द्यावा, अशी मागणी करण्यात आली आहे.
सदर प्रकरणाची चौकशी करून सर्व बेकायदेशीर टर्फ हटवावेत व संबंधितांवर कठोर कारवाई करावी, अन्यथा एका महिन्यात ठोस कारवाई न झाल्यास शहरव्यापी आंदोलन छेडण्यात येईल, असा इशाराही पत्रकार मित्र असोसिएशनच्या वतीने देण्यात आला आहे.
