🟥🟨 आजरा हायस्कूलमध्ये मराठी भाषा गौरव दिन विविध उपक्रमांनी उत्साहात साजरा 🟨🟥

आजरा : आजरा हायस्कूल येथे मराठी भाषा गौरव दिन विविध शैक्षणिक व साहित्यिक उपक्रमांनी उत्साहात साजरा करण्यात आला. कार्यक्रमाची सुरुवात थोर साहित्यिक कवी कुसुमाग्रज उर्फ वि. वा. शिरवाडकर यांच्या प्रतिमेचे पूजन करून करण्यात आली.
या कार्यक्रमासाठी प्रसिद्ध लेखक सलीम सरदार मुल्ला हे प्रमुख पाहुणे म्हणून उपस्थित होते. मराठी विभागाच्या वतीने तयार करण्यात आलेल्या “ज्ञानपीठ पुरस्कार विजेते मराठी साहित्यिक” या भित्तीपत्रकाचे उद्घाटन प्रमुख पाहुणे श्री. सलीम मुल्ला यांच्या हस्ते झाले. या भित्तीपत्रकाची सविस्तर माहिती मराठी विभागप्रमुख श्री. विजय पोतदार यांनी उपस्थितांना दिली.
कार्यक्रमातील पाहुण्यांचा परिचय सौ. व्ही. पी. हरेर यांनी करून दिला. मराठी भाषा गौरव दिनानिमित्त शाळेत वक्तृत्व, कथाकथन, निबंध लेखन व अभिवाचन अशा विविध स्पर्धांचे आयोजन करण्यात आले होते. या स्पर्धांतील विजेत्या विद्यार्थ्यांना मान्यवरांच्या हस्ते प्रमाणपत्रे देऊन गौरविण्यात आले.
शाळेच्या ग्रंथालयामार्फत मराठी शब्दकोश व विश्वकोशांचे विशेष प्रदर्शन आयोजित करण्यात आले होते. विद्यार्थ्यांनी या उपक्रमाचा मोठ्या प्रमाणावर लाभ घेतला.
यावेळी लेखक समीर मुल्ला यांनी मार्गदर्शन करताना सांगितले की,
“निसर्ग व मानव यांचे नाते अतूट आहे. निसर्गातील झाडे, प्राणी व पक्षी यांच्या प्रत्येक कृतीतून माणसाला जगण्याची नवी प्रेरणा मिळते.”
कार्यक्रमाचे अध्यक्षीय मनोगत शाळेचे मुख्याध्यापक श्री. ए. एल. तोडकर यांनी व्यक्त केले. कार्यक्रमास उपमुख्याध्यापिका सौ. एच. एस. कामत, पर्यवेक्षक श्री. ए. आर. व्हसकोटी, सर्व मराठी विषय शिक्षक, इतर शिक्षकवर्ग, शिक्षकेतर कर्मचारी व मोठ्या संख्येने विद्यार्थी उपस्थित होते.
कार्यक्रमाचे सूत्रसंचालन सौ. पी. एस. भोये यांनी केले, तर आभार प्रदर्शन सौ. बी. पी. पाटील यांनी मानले.
🟦🟩 मराठी भाषेच्या गौरवासाठी आयोजित केलेला हा कार्यक्रम विद्यार्थी, शिक्षक व उपस्थित मान्यवरांच्या उत्स्फूर्त सहभागामुळे संस्मरणीय ठरला. 🟩🟦